Silk tharah Assam chiah kan phak lo – CM || ‘CM Blue Mission hnuaiah lui saa intodelh kan tum’

Chief Minister Lalduhoma’n Mizoramin silk thar tam lamah Assam chiah phak loh a neih thu leh Chief Minister Blue Mission hnuaiah lui saa intodelh tum a nih thu a sawi.

Nilaini khan Ting Dil Run, Tinghmunah Tinghmun Allied Farming Cooperative Society Ltd. (TAFCOS) kum 25 tlin (silver jubilee) lawmna chu khuallian niin chief minister hian a hmanpui a, Ratu bialtu MLA a nih laia TAFCOS hmalaknaa Ting Dil khuah a nih theih nana tanpui theitu a ni chu a inchhuan thu sawiin, dil kaihhnawih hmasawnna dangte pawh chang zel turin duhsakna a hlan.

Chief minister chuan mihring siam chawp dilte chu tui hna humhalh nan, khaw lum lutuk ven nan leh khualzin hip nan a tangkai hle tih sawiin, “Aizawlah khualzin an len vek tawh loh avangin Tinghmun pawh khualzin hip thei tak hmun a ni a, khualzin hiptu pawimawh tak pakhat chu khawtlang nun leh a ram mite nungchang mawi a ni,” a ti.

Sorkarin hmachhawp tam tak a neih thu sawiin chief minister chuan, silk thar tam lamah Assam chiah phak loh a neih thu leh Chief Minister Blue Mission hnuaiah lui sa lama intodelh tum a nih thu a sawi a, sorkar hmalaknate chhawr tangkai tum tur leh Pathian malsawm tlaka taima leh dik taka thawk zel turin kalkhawmte a chah.

H. Lalthakima ziah lehkhabu ‘Tingdil’ leh TAFCOS Silver Jubilee Souvenir ‘Hmathlir’ chu chief minister hian a tlangzarh nghal a ni.

Khualzahawm Minister of State B. Lalchhanzova pawhin thu sawiin, thil tha tihduhna thinlung neihte tan remchang leh thawhpui tur an awm zel thu a sawi a, Tinghmun khaw mipuite inlungrualna fakin mahni khua leh ram hmangaih tlat turin a fuih.

January 18, 2000-a din TAFCOS hian member-te hmasawn nan vawk vulh, dawr siam leh AMFU hnuaiah aieng leh thlai chi hrang hrang chingin hma an la thin a; an hmalakna lian ber Ting Dil khuah hna hi March 11, 2009-a thawh tan niin, a dung meter 516, a vang meter 100 leh a thuk lai ber meter 7-a thuk a ni.

Leave a Reply

error: Content is protected !!