Aizawl khawpui tui harsatnain ziaawm lam a la pan thei lo a, tui neih loh avangin chhungkaw tam tak an mangang tawh a, tui phura eizawngte tan malsawmna nimahse, a mawhphurtu sorkar mawnghlimna dik tak erawh a ni si.
Tui harsatna hi tui lakna lama hnathawh leh harsatna thlen vang a ni tih kan hre fo tawh a, a changtu minister pawhin a lo sawi fo tawh thin. Mahse, a awm ang ang semrual leh pek kawngah hian pheikhai a rual ta lo thin hi ennawn a tha hle.
Sorkar in chhungkaw tinte ruahtui dahkhawlna tha nei tur leh tui dawn tha taka siam turin a han ngen ngawt a, mahse kan khawpuiah hian chhungkaw tam tak chu mi in luaha khawsa, tui dawn nei lo, nei ta tehreng pawh nise a dah khawlna tur hmun nei eih lote an ni a, insawihmuh thui chi vak niin a hriat loh bawk.
Sorkar hian tui sem dan hi ennawn fo se la, thla khata vawikhat chauh haw, chu pawh beisei pha lo leh duhkhawp la thei lo, an lak thin ang pawh la pha lo hi an awm nual ania! Hunpui kan thleng dawn a, tui mamawhna a sang lehzual dawn a, kan unaute tam taka mamawh lamin khawpuiah an lo bazar leh ngei dawn bawk. Tun hi lo inbuatsaihna hun a ni.
Tui semtute tam tak pawh an mangang ve tho a, mipuite duhkhawp pek tur an neih loh avangin tawngkam chhe tleuh nan tak hman an ni a, sorkar pawhin an dinhmun hre thleng se la, tui sem kawngah hian tan la thar teh se.
Mipuite hi tuilakna hmuna kala a, harsatna thleng mek hrilh leh ringawt thin lo hian tui sem a mumal a, thla khata vawikhat chauh ni lo deuh sem dante hi ngaihtuah se la, tan la zual mawlh teh se. Thla khata vawi khat pawh dawng thei lo chhungkaw thenkhat pawh hi a awm nawk a niawm bawk asin!