Chhinga veng Cricket Club chu MCL 2022 final-ah Chanmarians Cricket Club lakah an chak a, an club chanchin a vawi hnihna atan MCL-ah an champion.
Inrinni a Suaka Cricket Ground a inkhelah hian Chhinga Veng CC bowler ten an hna hnehsawh taka an thawh rah an seng a. Tun MCL a match 11 chhunga la tlawm miah lo Chanmarians hnehtu awmchhun an nihna kawngah an pawimawh a. Captain Lalnuntluanga chuan over 4 vawmin run 13 chiah a pek laiin wicket thum a la.
Chungnung takin Chanmarians in league season an khel a, semi-final ah Kulikawn CC an hneh. Final ah vuak an thlang a, inkhel pawimawhah an che fuh lo tlat.
Run 25 siam K. Lalremruata chu run siam hnem ber a ni a, Lalhmangaiha’n 15 thawhin midang run 10 siam tling an awm lova, over 20-ah 82 bak an tlin lo.
Chhinga Veng in bowler panga hmangin over 4 theuh an vawm a, wicket la vek bawkin Chanmarians lakah run an pe tlem. Lalhruaimawia Ralte chuan wicket hnih a la bawk.
Chhinga Veng in bat nen bul an tan tha bik lo, over hnih a ralin run siam miah lovin wicket hnih an hloh nghal. Mahse Gaurav Singh (27) leh K. vanlalruata (20) te inkawpin lei rem an rahpui a. Run 38 partnership an nei a, batting line up an neih thuk chu chhawr bawkin wicket 6 an hloh hnuah over 19-ah run 83 an siam a. Wicket 4 in an chak.
Kum 2018 a MCL trophy lo chawi tawh Chhinga Veng CC in a vawi hnih nan trophy an chawi a. MCL an khelh tawh apiangah final an la lut ziah.
Kum 2016 leh 2017 a champion tawh Chanmarians nen final-ah vawi thum an intawnna a ni a, tun tumah a chak zawkah an tang.
3C an lawm
Chhinga Veng CC club secretary Lalchhandama Sailo chuan, “MCL hi khel thei a kan qualify chin ah Chhinga Veng Cricket Club hian final kan la lut vek a, 2018 khan champion nomawi kan lo chawi tawh. Tun tum a champion trophy kan han chawi leh thei hi kan lawm hle. Player te thawhrimna rah a taka hmuh theihin a awm a,mimal ang a han khel tha fal tak han sawi tur kan nei lo a, team work dik tak avangin kan champion a ni.”
“He tournament kan champion theihna tur atan a kawng engkim a min thlawptu leh min sponsor-tu NECS te chungah club chuan lawmthu kan sawi tak meuh meuh a, an ni zarah tun hun hi thleng thei kan ni bawk. A tawp berah chuan heng zawng zawnga hlawhtlinna min petu leh kan dilna min tihhlawhtlinsaktu Pathian vanga tun hun hi thleng kan ni.” tiin an champion hnuah lawmthu a sawi.
Mimal chawimawina
Chhinga Veng tana ball leh bat hmanga player tangkai Sumit Lama chu Player of the Tournament a thlan a ni a. Match 11-ah run 163 siamin wicket 13 a la bawk a. Catch vawi 6 a nei.
Chanmarians opener, match 11 atanga run 322 siam Lalhruaizela chu Best Batsman a ni a. Wicket 17 la tu Chanmarians captain Bobby Zothansanga chu Best Bowler a ni bawk.
Chanmarians tana player 13 ti ‘out’ tu Saidingliana Sailo chu Best fielder a ni thung a.
Ramhlun Venglai tana match 10 atanga run 112 siam a, wicket 11 la kum 15 mi Johan Lalbiakkima chu Most Promising Player a thlan a ni.
MAPUIA MEMORIAL MIZORAM CRICKET LEAGUE 2022
Final
Chanmarians CC vs Chhinga Veng CC
Suaka Cricket Ground, Sihhmui, Aizawl, 20 Ov., Limited Overs, 30-Apr-22
Toss: Chanmarians CC in vuak an thlang
Chanmarians CC 82/9 (20.0 Ov)
K Lalremruata 25(36)
Lalhmangaiha 15(20)
Lalnuntluanga 3/13(4)
Lalhruaimawia Ralte 2/18(4)
Rosiamliana Ralte Junior 1/11(4)
Chhinga Veng CC 83/6 (19.0 Ov)
Gaurav Singh 27(45)
K. Vanlalruata 20(20)
Rajesh Chhetri 14(18)
F Malsawmtluanga 1/7(3)
TC Vanlalremruata 1/14(4)
Chhinga Veng CC wicket 4 in an chak
Man of the match : Lalnuntluanga (Chhinga Veng CC)