Manchester United chuan khelmual chhunga khawvela football club lian ber pawl an talbuai mek lai leh Premier League atanga tlahniam thei dinhmuna an din hnuah manager Michael Carrick-a an bân ta tih an puang.
Carrick-a chhuahtir hi United-in English league sang bera kum 40 hnua bul an tan chhiat ber tum an tawn mek avangin a chiang saa ngaih theih a ni a, Ningani khan club chuan ‘a rang thei ang berin a aiawhtu tur ruat a ni ang’ tiin an puang zui a ni.
“Manchester United chuan Michael Carrick-a chu mipa first-team head coach atangin a chawl tih a puang thei ta,” tiin Old Trafford club hian thu a chhuah.
“Season bul duhthusama tan loh a nih hnuah club chuan thutlukna harsa tak, kan tum tihlawhtling thei tura inthlak danglamna tur a siam ta a ni,” an ti.
Premier League-a vawi 13 champion tawh team hi manager an bân hma atangin US mipa team enkawl mektu, Mauricio Pochettino-a nen sawi zawm sa an ni bawk.
USA head coach atana tun hnaia contract thar ziak, Pochettino-a hi a contract pawh seinaah hian a tul dan azira chhuah theihna an ziak tel nia sawi a ni a. An la lut a nih chuan kum 26 hnua May, 2013-a Sir Alex Ferguson-a’n a chhuahsan hnua Old Trafford-a a ngheta mawhphurhna la pariatna a ni dawn a ni.
United hian thuchhuah an siamah hian Carrick-a chu ‘club legend’ tiin an ziak bawk.
“Player a nih lai ang bawkin Carrick-a hian inpekna, tumruhna, professional takin club tan a thawk a ni,” an ti a. “Season liam taa a kaihhruaina leh hlawhtlinna chu hriat reng a ni ang,” an ti.
Kum 45 miin United head coach nia a khelhpui tawp ber chu Old Trafford-a Aston Villa nen an inhnehtawk kha a ni dawn ta a, hemi tum hian fan-te chuan club neitute laka an thinrimna an tilang nasa hle.
United hian hun tawp dawn pek belhah 10naa awm, Villa lakah hnehtawkna goal thun hramin Premier League-a tlahniam thei pathum atangin an inkhai chhuak zo chuang lo.
Red Devils hi rei vak lo chhung a hniam berah an awm hman a, inkhel tawpah 18-naah kaiin khelh 10-ah point riat an hmu tawh.
January thlaa a nghet lova an lak, Carrick-a hi tun hnaia result duhawm loh tak tak an neih hnuah a hna a chân mai hlauhthawnawmin a lo awm fo tawh.
Vawi li chak loh leh vawi nga hnehtawk neiin August thlaa Ipswich Town laka an chak hnuah chak an la nei leh lo.
English League Cup-ah 3rd round-ah hnawh chhuah an ni a, Champions League-ah pawh ropui tehchiam chuang lovin vawi hnih chakin vawi hnih bawk an tlawm tawh.
Tun season-a intihsiakna hrang hrangah United hian khelh 15-ah vawi thum chauh hnehna an la chang a ni.
Carrick-a bân a ni leh ta hian club hian enkawltu nghet an nei hlei thei lo tih a tilang thar a. An midfielder hlui, player nia a khelh tawp ber season-a captain ni hial hian season hmasaa pasarihna a nihpui laia bân, Ruben Amorim-a thlakin pathumnaah a kaipui a, Champions League a khelhpui phak.
Season liam ta chanve hnu lama a enkawl tantirh hian player-te pawh tha zawkin an inlan a, an phur hmel tih pawh a lang a; mahse, season tharah hian fan-ten beiseina sang tak nena an lo thlirna ang hlen zo lovin a talbuaipui zui ta thung a ni.
League season tannaah United kai thar, Hull City lakah an tlawm nghal a, vawi tam lo champion tawh team buaina a intan a. A hnuah khelmual chhung leh pawnah neuh neuh a awm a, Carrick-a hmel timawi lo thei tak tak thil pawh thlengin club neitute duh lohna pawh a langsar zui hle.
British chanchinbute chuan Carrick-a kalsan hna rual thawk thei tura rin manager langsar tak tak pawh an ziak nasa hle.
A tirah chuan Newcastle United boss Eddie Howe leh Germany coach hlui, Julian Nagelsmann-a hming pawh a ri a; mahse, Pochettino-a chu tunah hian rinkai ber a ni ta zawk rih.
Pochettino-a hian a hmain English league sang berah Tottenham Hotspur leh Chelsea a lo enkawl tawh a, US leh British chanchinbuten Old Trafford pan ngei tura an rin a ni.
Chelsea coach hlui, Antonio Conte-a hming pawh sawi rik a ni bawk.
Carrick-a a chhuak ta hi tuna ram leh ram inkhelh avanga club inkhelh chawlhsan laiin a thlen rin sa a ni a. United hian an khelh leh hmasak ber, November 22-ah an elpui lian ber pakhat, Liverpool chu Anfield-ah an tlawh dawn a ni.