Aizawl: KTP General Conference vawi 59-na chu nizan atang khan Kolasib, Diakkawn khelmualah neih tan a ni.
Inkhawmpuia tel tur palai tam zawk chu nimin khan Kolasib an thleng a, mikhual hi an la thlen belh zel tura ngaih a ni.
Nizan khan palai lawm inkhawm neih a ni a, kum puan hawnna, kumpuan thupui hlanna leh Synod Choir music video hlanna hun hman a ni.
KTP General Conference chhung hian chhun leh zanah inkhawm, fellowship leh thupui zirhona hun te neih a ni dawn a, Inrinni chhunah Central KTP hruaitu thlan leh rorel inkhawm neih a ni ang a, Pathianni zanah conference hi a tiak ang.
KTP General Conference neih hun pangngai chu March 3-6 a ni a, hripui leng avangin May thlaah sawn hlat a ni a; tun tumah hian hripui leng avangin branch tina palai kal zat tur pawh bituk a ni.
He inkhawmpuia palai kalte hi counter tinah google registration tih vek a ni a, heta an chhinchhiah danin nizan dar 7 vel thleng khan lirthei chi hrang hrang 536 hmangin palai 3,417 an kal tawh a ni.
Kumin KTP General Conference-ah hian Revd Chuauthuama, Ramhlun Vengchhak chu speaker tur a ni a, thupui atan ‘Tunlai thil awmzia’ (Rom 13:11) chu hman a ni ang.
KTP General Conference hi kum 2004 thleng khan kum tin neih thin a ni a. Kum 2014-a YMA Field, Vaivakawna conference nghah a nia KTP-in kum 50 a tlin, Golden Jubilee lawm hnu atang khan kum khat dana neih tura rel a ni a, hemi dawt chiah conference pawh hi kum 2006-ah neih nghal a ni.