Aizawl: MJA General Hqrs President C Lalrambuatsaiha’n nimin khan ‘Kum 10 chhung Budget thlirna’ lehkhabu a tlangzarh.
‘Kum 10 chhung Budget thlirna’ lehkhabu hi Malsawmdawngzela Hrahsel, News Reporter, Vanglaini ziah niin, Aizawl Press Club-a tlangzarh inkhawm neih a ni.
C Lalrambuatsaiha chuan MJA member zinga mi Malsawmdawngzela Hrahsel-in lehkhabu hlu tak a sual chhuak chu lawmawm a tih thu a sawi a, “Kan ram mamawh tak lehkhabu a tichhuak thei hi kan lawmpui a, a dang pawh la tichhuak zel turin ka chah a ni,” a ti.
MJA Gen Hqrs President chuan, “Lehkhabu tihchhuah hi a harsa, finance leh budget lam phei chu a harsa leh zual. Hetiang lehkhabu hi Mizoten kan la nei mang lo a, he lehkhabu hi Mizo hnam tan a tangkai tak zetin ka ring. Budget hi thil har tak a ni a, MJA-te pawhin kan zir fe a ngai thin a ni,” a ti a; mi thiam tam tak pawhin budget chu an zir fe thin thu a sawi.
Lehkhabu tlangzarh inkhawm hi MJA member Lalnuntawma Fanai-in a kaihruai a, Lalthlamuana Ralte, Asst. Professor, PUC in lehkhabu thlirlawkna hun a hmang.