Aizawl: KTP General Conference vawi 59-na chu Kolasib Diakkawn khelmualah neih chhunzawm zel a ni a, nimina rawngbawlna report inkhawma tar lan a nih danin nikum chhung khan KTP member thi mi 456 an awm tih tar lan a ni.
Nimina Pandal-a rawngbawlna report inkhawm neihah general secretary-in hmalakna hrang hrangte a tar lang a, bial report khaikhawm leh finance report pawh ngaihthlak a ni.
Rawngbawlna report-a tar lan a nih danin KTP-ah pastor bial 216-ah branch 891 an awm a, chung zinga branch 45 chu Mizoram pawna mi a ni a. KTP member 1,57,830 awmin, mipa 97,542 leh hmeichhia 60,288 an ni a, kum hmasa 2020 aiin mi sang 2 leh 977 an pung.
Kum 2021 chhung khan KTP member thi mi 456 an awm a, mipa 386 leh hmeichhia 70 an ni a, mipa thi zat hi 84.64% niin, hmeichhia thi zat chu 15.35% a ni a. Mitthi zat hi kum 2020 aiin 34-in an tam zawk a. Pastor zinga bial 60-ah KTP member thi an awm lo.
Kum 2021 chhung khan KTP member nupui pasal nei 3,836 an awm a, chung zinga 1,815, zaa 47.31 chu biak ina innei niin, 2,021, zaa 52.69% chu hmun danga innei an ni.
Nikum chhunga KTP bial 216-te sum thawh chhuah belhkhawm chu Rs. 3,55,94,402 a ni a, branch 891-te sum thawh chhuah belhkhawm chu Rs. 26,62,95,467 a ni thung. Kum 2021-ah KTP member missionary-a chhuak thar mi 48 an awm a, missionary-a chhuak mek 1,004 an awm a ni.