Congress President Sonia Gandhi chuan Prime Minister Narendra Modi chu na taka beiin a kaihhruai sorkar chuan inhalna lian tak a siam a, hnam leh sakhaw tlem zawkte nekchepin politics-a a eptute a tihthaih nasa niin a sawi.
Jaipur, Rajasthan-a an party-in intuaitharna, Chintan Shivir an neihah Gandhi chuan Zirtawpni chawhnu khan thu sawiin heng thilah hian ‘prime minister thu sawi thiam tak’ chu ramin a vawi khat tawh pawh a mamawh em em laiin a ngai tlat niin a sawi bawk.
“Prime Minister Narendra Modi leh a party hian inhalna a tuh nghet hle a, hei hian ram hi hlauhna leh him lohnaah a dah a. Mi tu emaw beihna, kan rama mi tin kan intluktlanna karah tlem zawkte hnuaichhiah leh nekchepna a thlen nasa a ni,” tiin Gandhi chuan a sawi.
“Kan khawtlang nuna inhuatna hian min tidarh a, inpumkhatna leh inlungrualna a tichhia a. Politics-a a eptute chu a vau bet a, an duh dan palzamsak an ni a, thil chhuitute hmuh loh dan angin tan inah pawh a khung mai a ni,” tiin Congress chief hian a sawi.
“Kan hruaitute pawh a dah hniam a, a bik takin Jawaharlal Nehru pawh a dah hniam a. Mahatma Gandhi thattu dah san a ni a. Chu chuan mipui rorelna a tichak lo va, heng zawng zawngah hian kan prime minister thu sawi thiam tak hi a vawi khat sawi pawh kan mamawh a nih laiin a ngawi tlat a. Kan khawtlang then darha awmin hman ata tawh kan inpumkhatna a tichak lo a ni,” a ti.
An intawh khawmnaah hian Congress hruaitute chu rilru inhawng taka thil sawiho turin a sawm a, Gandhi-i chuan an party rorel khawl chu inthlak danglam an mamawh tak zet tih a sawi a, an inrawn khawmna chuan awmzia nei sa a duh tak zet tih a sawi bawk.
“Kan pawla inthlak danglamna hi tuna kan mamawh a ni a. Kan hna thawh dan kalhmang tihdanglam a ngai,” a ti.
“Party mite hi in ngaihdante tlang takin he Shivir-ah hian sawi turin ka ngen cheu va; mahse, party chak leh inpumkhat kan nihna hian ram deng chhuak rawh se,” a ti.
Udaipur-a Congress hruaitu inrawn khawmnaah hian hruaitu 400 chuang an tel a. Rahul Gandhi leh Priyanka Gandhi Vadra pawh telin tun hnaia inthlana an chak lo zawn hrep hnuah fim taka inngaihtuahin intuaitharna hun an hmang.
“Kan pawl hi keimahni kan inngaih pawimawhna aia sanga dah tur a ni a. Party hian thil tam tak min pe tawh a, kan pek let ve a ngai a ni,” tiin Gandhi-i chuan a sawi.
Insiam that tum nasa
Congress-in ni thum chhung Nav Sankalp Shivir an neih hi Zirtawpni chawhnu atanga tan kha niin ni thum a awh dawn a. Nasa taka insiam that an tum thu an sawi nasa.
An insiam thatna tur sawi lian tak zingah hian eng level-ah pawh a zahve (50%) chu kum 50 hnuai lam ni se tih an tum a, hei hian an party-a rorelna sang ber, Congress Working Committee (CWC) pawh huamtir an tum.
‘Chhungkaw pakhatah chanvo/ticket pakhat zel’ (one family, one ticket) pawh an rawt zingah a tel a. Party-a kum nga chhung tal hnenah chauh ticket hi pek ni se tih an tum a, an sawiho tur zinga mi a ni.
Chhungkaw pakhat atanga mi pakhat zel hian Gandhi chhungkua – Sonia, Rahul leh Priyanka Gandhi Vadra te chu ngaihhnathiam an ni dawn em tih hriat a ni lo va. Vadra-i hian January, 2019 atang chauh politics a luhchilh a, kum nga tak tih an kalpui theih dawn chuan inthlan a chuh theih loh hmel hle.
All India Congress Committee (AICC) Gen Secretary Ajay Maken chuan Shivir an neih hi Congress kal dan siam danglamna tura inrawnna a nih thu a sawi a. Party dangten mipui rorelnaa hmanraw chhuak tharte an hman zung zung laiin an hnufual niin a sawi a, a hmang nasa ber nih an tum tawh tih a sawi.