India-in wheat thawn chhuah a tihtawp hnuah khawvel puma a man chu nasa takin a to nghal.
Chicago-ah chuan wheat man hi 5.9% zeta to nghalin thla hnih chhunga a to lai ber a ni.
Khaw lum leh ni sa lutukin wheat chin a tihchhiat nasat avangin India hian a thawn chhuah a titawp a, a ram chhungah pawh a man a to phah hle.
Wheat man hi tun hnaiah a san hret hret avangin khawvel pumah chhangthawp leh cake atanga noodle leh pasta man thlengin a to phah.
India sorkar hian lehkha tihfel sa bak chu thawn chhuah a ni rih dawn lo tih a sawi a, ei tur mamawh ngawih ngawih ramten an dil chuan an mamawh ang chin chauh pek an ni dawn tih a sawi bawk.
Sorkar thuneitute chuan thawn chhuah khapna hi kalpui reng tur a nih loh thu leh ennawn thuai a nih tur thu a sawi.
India-in a wheat thar chhuahte thawn chhuah a khap hi khawvel ram lian pasarih, Group of Seven (G7)-a agriculture minister theuhte Germany-a thukhawm chuan an sawisel nasa hle.
“Tu pawhin thil thawn chhuaha khuahkhirhna a siam emaw, leisak phal lohna emaw a siam a nih chuan harsatna awm mek a tizualkai mai mai a ni,” tiin German Food & Agriculture Minister Cem Ozdemir chuan a sawi.
G7 an tihte hi khawvela ei leh bar dinhmuna tha ram pasarihte intelkhawmna niin khawvel sumdawnna leh pawisa vir vel pawh an thunun nsa hle a. Canada, France, Germany, Italy, Japan, UK leh United States te an tel.
India hi khawvela wheat thar chhuak tam ber dawttu a ni a, tun hma lamin a thar chhuahte hi a ram chhung deuh chauhva a hrilh thin avangin ram danga thawn chhuak tam ram a ni ngai lo.
Tun dinhmunah erawh Ukraine chuan Russia-in a rûn avangin a thawn chhuak thei lo va. Ram dang thar chhuak hnem thinten khawkheng leh tui lian an tawrh nasat avangin kum dang an phak lo va, India hian an thachhang a dawl theih beisei a ni.
Thawn chhuah a khap hma khan India hian kumin chhunga tonne maktaduai 10 tal thawn chhuah a tum a ni.
Putin-a’n Ukraine a rûn vang vek!
February thla tawp atanga Russia-in Ukraine a rûn hnu lawk, March thla atang khan khawvel pumah ei tur lam kaihhnawih thil hi a to tan vak niin United Nations (UN) chuan a sawi.
Indona chhuak hian khawvela nihawichi tel thawn chhuak tam ber, Ukraine-in a thawn chhuak thei lo nghal a, a kalpui dang ei leh in atana mamawh thlengin a to nghal phah a. He ram hi ei chi thlai, vaimim leh wheat thar tam ram a ni lehzel bawk a, an chet theih miah loh avangin khawvelin a kham khawp a hmu lo va, a awm chhun a to phah.
UN chuan khawvel puma chaw lam kaihhnawih man hi April thlaah a tlahniam leh hret tih a sawi a; mahse, nikuma hetih hun laia a man aiin 30% dawnin a la to tho tho.
Ei tur lam chi a to rual hian energy an tih, tuialhthei leh boruakalhthei chu khawvel pumah a to nghal bawk.
Ei leh in leh energy man to lutuk thunun tur hian central bank lian tak tak, US Federal Reserve leh Bank of England pawh huamin, an pawisa punna zat bi chu nasa takin an tihsan phah.
Pawisa punna bi tihsan hian nakin lawkah thil puk man a tihsan leh hlauh a ni tho va, hei hian khawvel eibar dinhmun kaltluang lai a tithuanawp thei dawn niin mi thiamte chuan an ngai.
Pathianni khan Wall Street investment banking giant Goldman Sachs-a an senior chairman, Lloyd Blankfein chuan khawvela economy lian ber, US-a a kaltluang lai a chawlh hi thil hlauhawm tak a ni dawn tih a sawi bawk.