India hmar lam chu khaw lum uchuak takin a tuam leh mek a, khawpui ber, Delhi-a hmun thenkhatah chuan khaw lum lam hi 49.2°C lai a kai.
Khawpui ber hi March thla hnu lama khaw lum uchuakin a tuam vawi ngana a ni tawh.
Thuneitute chuan ram chhung hmun tam taka mite chu khaw lum a la kian mai rih dawn loh avangin inveng fimkhur turin an chah.
Khaw lum leh ni sa lutuk chuan hriselna dinhmun pan deuh bakah nausen te, kum upa leh natna benvawn neite hriselna a khawih pawi phak niin an sawi.
Tun hnaiah Himachal Pradesh, Haryana, Uttarakhand, Punjab leh Bihar chuan khaw lum tak hi an lo tuar tawh bawk niin weather department chuan a sawi.
Khaw lum lam hi 2-4°C velin hmun thenkhatah chuan a hniam dawn niin an sawi a; mahse, hmun tam zawkah erawh a la lum dawn niin an sawi.
India Meteorological Department (IMD)-a senior scientist Naresh Kumar chuan tuna khaw lum uchuak tak thleng hi tual chhunga boruak inlumletin a nghawng chhuah niin a sawi.
A chhan lian ber pakhat chu khawthlang, Mediterranean bawr atanga ruahtui pai thli thaw thin a chak tawk lo vang a ni a. He thil hi furpui tak tak hmaa hmarthlang leh ram lailia ruah hmasa thlen thin a ni.
Anticyclone an tih, boruak nekna nasa tak karah boruak dang inhlum tel chuan a tilum a, March thlaa khawthlang lama khaw ro tak a thlen bawk.
Khaw lum uchuak hian mi maktaduai tel khawsak phung a tibuai.
Tun thla tir khan Prime Minister Narendra Modi chuan state chief minister-te chu a nih dan pangngai aia khaw lum chak laka mite an him theihna turin ruahmanna siam turin a lo chah tawh.
India-ah hian khaw lum uchuak tak ang hi a thleng fo va, a bikin May leh June-ah a ni zual thin a. Kuminah erawh March atangin a intan der a ni.
March thla puma khaw lum dan chawhrual kha kum 122 chhung zeta a san ber tum a ni hial.
Centre for Science & Environment chuan khaw lum uchuak thawk hma hi state 15 velin an tuar niin a sawi a. Heng zingah khaw vawh leh lum dan nuam tawk reng nia sawi, Himachal Pradesh pawh a tel.