Manipur police-te chuan chanchinbumi pakhat leh mihring dikna chanvo humhalh lama beitu pakhat chu social media-a Covid-19 avanga BJP hruaitu hlun thi ta an sawi zui dan avangin an man.
Chanchinbumi, Kishorechandra Wangkhem leh activist Erendro Leichombam hi Ningani zan khan state BJP vice-president Usham Deban leh general secretary P Premananda Meetei ten FIR an thehluh bawhzuiin an chenna in atangin an man niin NDTV chuan a tar lang.
BJP hruaituten police hnenah thu an thehluhah chuan an state party president, Saikhom Tikendra Singh-a thih chungchangah social media-a thu post-ah, “Bawng ek leh bawng zun hian eng hna mah a thawk lo,” an tih avanga thubuai thehlut an ni.
Chanchinbumi, Wangkhem-a hi tun hma pawhin social media-a a thu post avangin vawi hnih lai man a lo ni tawh nghe nghe.
Manipur-a BJP kaihhruai Manipur sorkar chuan National Security Act (NSA) bawhchhiain, ram sawi chhia leh bei zawngin a che niin an lo puh tawh a ni.
Manipur state BJP president thi ta, Singh hi professor chawl tawh a ni.
Singh-a hi hri a kai tih hmuh chhuah a nih hnuah Imphal-a Shija Hospital-ah enkawl reng a ni a, Ningani kal ta khan a thi a ni.
A thih hian BJP national president Jagat Prakash Nadda leh Union Home Minister Amit Shah bakah Chief Minister N.Ibobi Singh te pawhin an ui thu an sawi hlawm.