Mara Autonomous District Council (MADC) inthlanna neih zawk taka party mala sorkar siam thei an awm loh hnuah, Mizo National Front (MNF) leh Indian National Congress (INC) ten thawhho an remti.
Siaha atanga thu dawn danin, nimin tlai khan MADC-a sorkar siam tur hian MNF leh INC te hun eng emaw chen an inbiak hnuah thawh ho an rem ti a. Hei hi Congress party thuneitu sang, Political Affiars Committee (PAC)-in an party aiawha MDC thlan tlinte chu MNF nena thawhho a rem tih hnuah an inrem thei ta nia sawi a ni.
Thudawn danin, MNF leh INC an inremna ang chuan Phura bial atanga INC ticket-a thlan tlin, H Malvina chu CEM a ni ang a, Dy CEM chu MNF chuan changin, Amotlah bialtu Lalmalsawma Zasai a ni ang a. MNF ticket-a thlan tlin vek, Siaha South bialtu N Viakhu chu MADC chairman a ni ve thung ang.
MNF-in MDC pakua an neihte hian nihna an nei vek dawn a, Dy CEM leh MADC chairman an chan bakah Dy Chief Whip leh Planning Vice Chairman leh EM panga an nei dawn a. INC pawhin MDC pali an neihte hian nihna nei vekin, CEM an chan bakah EM pathum an nei dawn a. Heti hian MNF leh INC atanga thlan tlin MDC-te hian chanvo an nei vek dawn tihna a ni.
The Zozam Times zawhna chhangin MNF Adviser Lalruatkima chuan MADC-a sorkar siam tura INC nena an thawh dun chungchangah, “Mara mipuite hian sorkar ngial nghet leh rintlak an beisei a. Politics chiri tak kara sorkar siam thei an awm tak lohah chuan MNF party chuan tute pawh nise Mara mipuite thatna turin kan thawhpui thei vek e kan ti a. Chumi ang chuan Congress party an rawn pen chhuak ta a ni ber mai,” a ti a. Siaha lama MNF party hruaituten ruahmanna an siam hnuah INC nena thawhho an rem ti ta tih a sawi.