Aizawl : MNF Adviser Dr R Lalthangliana chuan MNF danglamna sawiin, sorkar hmasa thil tih pawh nise ram tana tha tur chu a hnawl loh thu leh a chhunzawm zel thu a sawi.
Hnahthial Electric veng Community Hall-ah nimin khan ‘MNF Sotuh Tuipui Block-I Political Training’ neih a ni. He hun hmanpuiti bialtu MLA Dr R Lalthangliana chuan, kum 1998-a MNF sorkar khan, sorkar hmsa Congress-in district thar panga chu a thu ringawta an puang chu tihpuitlin harin hautak viau mah se, MNF sorkar khan cabinet-ah relin sorkar hmasa puan mah nise kum 2003-a an sorkar tawp dawn khan district panga te chu pangngai taka an kalpui thei tih a sawi.
Kum 2008-a an term tawp dawn hnaih khan Hnahthial, Saitual leh Khawzawl kha district ah puang mah se, Congress sorkar kum 10 chhung khan an chhunzawm ve lo a, an tihpuithlin theih loh kha, kum 2018-a an sorkar tirh atanga thla ruat chhung lekin district pathum an puan chu pangngai taka an kal tur leh hman tih sawiin, “MNF danglamna chu, sorkar hmasa thil tih pawh kan ram tana tha tur chu a hnawl ngai lo a, a chhunzawm zel a ni,” a ti.
MNF sorkar tirh kum hnih leh a chanve deuhthaw chu hripuiin, ran pul hri leng, lirnghing, ram kang leh ral tlan avangin harsatna hrang hrangin a tlak buak hnuah, tun hnaiah a tharin hma an lak tan ve dawn chauh tiin, Mizo hnam partypah mi zawng zawng an leng vek a, lut zel tura sawmin, “La sorkar miah lo hi Mizoramah an sorkar ka ring lo a, lo sorkar palh pawh ni se, Minister pawh la ni ngai lo kha CM ta se, thla tam an kal lo ang, an chhung ril kawrawngzia hi mi tam takin an hre lo,” a ti bawk.
Covid-19 avanga SEDP an kalpui hleih theih loh hnuah, kumin leh nakkum ah te nasa taka hmalak an tum thu a sawi a. “Health Worker-te hi kan lak theih hunah pawh a khaw mi ngei duhsak ni se, a khaw mi tak lak tur an awm loh hi pawhin a khaw hnai vaia mi ngei lak tha kan ti a, a chhan chu transfer dil zung zung loa, mahni thawhna hmuna awm nghet tur hi kan duh a ni,” tiin Health Minister Dr R Lalthangliana hian a sawi.