Manchester City in goal hnih an chhuah hnuah an sut hram a. West Ham United lakah point khat hmu hramin Premier League champion ni tura beiseina an neih erawh an la tinung.
Pathianni zanah London Stadium-ah City in Hammers an tlawh a, hnehna chang se champion an ni chiang tluk a ni tawh. Mahse an dinhmun sawi nghin in a awm hman a. First half-ah Hammers tan Jarrod Bowen chuan minute 24-na leh 45-naah goal a khung.
Hei hi second half tan tirah Jack Grealish chuan a chhanglet a. City insiamtha in na taka goal nawrin Vladmir Coufal own goal an neih belh leh bawk a. Huntawp nan minute nga bak a awm tawh lo tihah City in hnehna chan theihna remchang an nei.
Craig Dawson chuan Gabriel Jesus ti tlu in penalty a chawi a. City tana a penalty pet hnuhnung pakua a khung vektu Riyad Mahrez chuan pet in Lukasz Fabianski chuan chiang takin a lo dansak.
Tlawm se City hi an hnuai a awm Liverpool in tunkarah an point hmuh zat hmuh theihna remchang an nei tihna a ni a, an tan point khat hmuh a hlu.
Lehlamah point khat hmuh belh hi West Ham tan a hlu ve thung a, season tharah Europe huap inelna khel turin an tling chiang a. An club chanchina a vawikhat nan season zawnin Europe inelna an tem dawn.
City an talbuai teuh
London Stadium-ah Man City leh Pep Guardiola ten record an nei tha thin a, nimahsela tunhnaia he stadium a an inkhel hnuhnung pathumah chak an nei lo vek.
Hammers tan Michail Antonio a tal hnawk hle a, an tlarhmaah Bowen nen City defense an chawk buai hneh.
City tan Grealish-a goal a pawimawh a, goal a khung hma avangin tho leh turin inrintawkna an nei. Ni lo se Hammers an khelhthat avangin City dinhmun a chhe hman.
Ball an chan tam hnuah City an hlauhawm chungin Hammers in an tlan chakna leh Antonio tharum hmangin vawi engemaw zat an tihthaih fo thin a. City tan point khat hmuh hi tlawm aiin lawmna tur a la ni.
Eng nge an sawi?
Manchester City boss Pep Guardiola chuan, “Team tha tak, set piece leh ball an chan veleh a insiamrem thiam tak an ni a, anni khelh hi a hautak hle. A pumpui a thlir chuan kan khel tha a, kan football duhdan ang kan khel thei a, chak tur pawhin chance kan insiam hnem.”
“Dawhtheihna kan lantir a tul thin a, chak chu kan duh ber nimahsela draw result pawh hian kan champion leh champion loh chu kan kutah a la dah avangin a tha tawk a. Man City chhungkaw hmaah ngei champion kan tum.” tiin a sawi.
West Ham manager David Moyes chuan, “Result tha tak a ni a, point khat kan hmu dawn tih hre sa ila kan lawm ang. First half kan khelh dan phei kha chu kan beisei phak lam a ni tawh zawk.” tiin a team a fak.