Juventus forward Paulo Dybala chuan season tawpah club a chhuahsan tur thu a puang a. Nizan a Lazio nen an inkhel chu Turin club-ah an muala a inkhel hnuhnung ber tur a nih thu a sawi.
Argentina forward hi Allianz Stadium chhuahsan mai tur anga sawi a ni fova. Contract thar chungchang sawiin club leh a aiawhte chu vawi engemaw zat inbe mahse nikum hmasa atangin inremna an nei thei lo.
Kum 28 mi hian a chhuah tur thu a sawi chian tak avangin Europe club lian ho an inralring a, ram hrang hranga club tha te nen sawizawm a ni mek.Engtinnge a sawi?
Dybala chuan social media-ah, “Thu hmanga han sawifiah pawh a harsa, kum tam tak, thil tam tak khelmual chhungah kan hmangin kan tawng a, kan tawn belh zel tura ka ngaih laiin kan zinkawng zawh a hran a ngai.”
“Ka inkhelh zawng zawng, ka goal te leh in hma a hun ka hman zawng zawngte ka theihnghilh tawh ngai lovang. In hnenah ka puitling a, ka inzir a, ka suangtuahna te a takah ka chantir thin. Kum sarih duhawm tak kan hmang a, trophy 12 leh goal 115 te hi tuman an nawtreh thei tawh dawn lo.” a ti.
Dybala hi Giorgio Chiellini hnua club chhuahsan tur sawi chiang leh hmasa ber a ni a. Premier League club te nen sawizawm a lo ni fo tawh a. Paris Saint-Germain chuan Kylian Mbappe thlaktu atan an melh mek bawk.