Aizawl: Central YMA hruaituten nimin khan Chief Minister Zoramthanga chu a pisaah kawmin Mizorama dan lova kuhva tawlh leh ruihhlo do chungchanga hmalak dan turah rawtna an thlen a. State Level Core Committee on Ruihhlo Do din thar an duh thu an hrilh bawk.
Central YMA hnuaia Mizorama dan lova kuhva tawlh chungchang zirchiangtu Study Team-in an zirchianna atangin report an siam a, point 12 zinga point li chu sorkar hmalakna tur a ni a, chung rawtnate chu chief minister hnenah hian an thlen a ni.
Rawtna an thlenah chuan dan anga sumdawnna a kal theih nan kuhva a chhiah lak, Basic Custom Duty zaa 40 chu zaa 20-a tihniam tura hmalak rawtna a ni a, kuhva rawn luhna district chu ramri leh hmun pawimawh a nih avangin hemi huam chhunga sorkar lam thawktu ruat chungchangah mi bik leh rintlak ruat tura rawtna a ni.
Hei bakah hian kuhva luhna ber, Champhai district-ah dan lova sumdawnna khuahkhirh a nih theih nan DC, SP, NGO aiawhte telna District Level Coordination Committee din nise tih leh police, custom leh Assam Rifles te rualkhai taka an thawhho theih nan hmalak nise, tih te a ni.
YMA hruaitute chuan tun hnaia Mizorama ruihhlo hluar lutuk chungchanga hmalak dan tur leh kum 2018-a chief minister kaihhruaina hnuaia din ‘State Level Core Committee on Ruihhlo Do’ chu tuai thar leh an duh thute sawi bawkin, chief minister hian he committee hi tuai thara May 27, 2022 (Zirtawpni)-a meeting koh nghal turin ruahmanna a siam nghal bawk niin Central YMA thuchhuah chuan a tar lang.