AZL: BJP Siaha District President M Laikaw chuan Mara Autonomous District Council (MADC)-ah lalna leh ropuina aiin party policy hlawhtlinna ngaih pawimawh zawkna avangin, inlungrual taka a tul dan ang zela opposition-a awm pawh a tha zawk tih a sawi.
Nimina Saiha-a BJP party office-ah thu thar thehdarhtute kawmin M Laikaw hian MADC inthlan neih zawk taka party mala sorkar siam thei an awm tak loh hnuah ram tan policy-ah inpumkhat thei deuh tura ngaiin district hotute leh central hotute rawn chungin INC nen an indawr tih a sawi a. Mahse, INC chuan MNF thlawpin, INC kaihhruai sorkar din turin thlutlukna siam a ni ta tih a sawi.
M Laikaw chuan BJP-in a ngaih pawimawh ber chu MADC thuneihna lian zawk (6th Schedule Amendment) a nih avangin central sorkar duhdan kalh lo leh Maraland mipui duh dan thlir chung zela ke pen a nih thu a sawi.
BJP Legislature Party-in MADC sorkar ding tur chu ngun takin a thlirlawk tih sawiin, “Kan ram leh hnam, kan ram tan kan policy hlawhtlinna kan hmuh theih nan ‘Pathian remruatna a ni zawk ang e’ tiin a pawm ta a ni. Lalna leh ropuina aiin party policy hlawhtlinna ngaih pawimawh zawkna avangin inlungrual takin, a tul dan ang zelin oppositon-a awm pawh hi tha a ti zawk a ni. Mipui thuneihna zahawmna humhalh pawh hi tha a ti bawk,” a ti.
MADC-a INC-MNF sorkar lo piang tur erawh chu tumna leh policy mumal awm lo, tlachawp leh khingbai taka kal tur a nih dawn avangin mipui tan a thlamuanthlak lo a tih thu a sawi a. Sawrkar tha, rintlak leh nghet, ram policy bawhzui chhunzawmtu tur sawrkar din turin BJP chu englai pawha a inpeih reng tih a sawi.
M Laikaw hian MADC inthlan fel fai tak neih a nih theihna atana thawktu zawng zawngte leh BJP official candidate thlang tlingtu bakah candidate-te chungah lawmthu a sawi nghal bawk.