Aizawl : ZPM thalaiin Mizoram hmun hrang hranga sorkar sikul building a chhiat lutuk avangin tunhnaia ruahsurah zirlai leh zirtirtute tam tak chu sikul an kal thei lo hial nia sawiin, “Hetiang thil duhawmlo hi a thlen nawn loh na tura chak taka hma la turin Education Minister kan phut” an ti.
ZPM thalai chuan “Sikul chei ṭhatna tura sorkarin NABARD sum Rs. vaibelchhe 35 a puk hnuah pawh ruahsur laiin tawmhulna mumal a awm loh avânga zirlai sikul choka-a khungkhawm an ni leh, naupang tana sikul compound a him loh avânga sikul chawlh hial a ngai hi a inhmehlo hlein kan hria” an ti a. Sikum cheithatna tura sum puk chu a hmanna tur dik takah hman a ni lo em ni tih sawifiah turin Education Minister Lalchhandama Ralte chu an phut bawk.
“Zirna lama tawnhriat ngah tak nia ngaih, education minister enkawlna hnuaia hetiang thil duhawmlo tak a thleng hi pawi kan ti a, he thil thleng hi education minister mawhah kan ngai” tiin, ZPM thalai chuan fur ruahtui tlak tam hmaa hma la tura an phut thu an sawi bawk a ni.