Sorkar laipui aiawha khawpui bera awm, Delhi Lieutenant Governor Anil Baijal chuan President Ram Nath Kovind-a hnenah Nilaini khan banna a thehlut a, ‘a mi mal thil vang’ nia sawi a ni.
Sorkar hnathawk thin, Baijal-a hi December, 2016 atang khan Lieutenant Governor a ni tan a, a hma chiaha bâng, Najeeb Jung a thlak a. Kum nga chhung a term a hmang zo hnai a, amah thlaktu tur pawh ruat fel tep a ni.
Delhi-ah hian Lieutenant Governor hi khawpuia rorel lai, Aam Aadmi Party (AAP) leh sorkar laipuia rorel, BJP nena inpawhna nasa tak kara awm a ni a. Thuneihna chungchanga inpawhna hi kum 2018 khan Supreme Court-in chiang zawkin a tifel chauh a ni.
Lieutenant Governor hian amaha thutlukna tak tak siam turin thuneihna a nei lo va, thuneihna tak tak chu mipui thlan sorkar kutah dah niin hei hi Supreme Court-a Mr Kejriwal-a sorkarin kum tam tak chhung Delhi thunun tuma an beihnaa hlawhtlinna an chan lian tak a ni.
Court sang ber hian ram, police leh vantlang tana thupek chhuahah Lt Governor hian amahin thutlukna a siam thei lo tiin ram danpui tlawhchhanin thutlukna a siam a ni.
Court-in thutlukna a siam hnuah pawh hian Baijal-a hian Kejriwal-a sorkar lakah hian thutlukna a siam hnan fo va, AAP hruaitu hian nasa takin a beih phah thin.
Tu nge Baijal?
Baijal-a hi 1969 batch AGMUT (Arunachal Pradesh-Goa-Mizoram leh Union Territory) cadre IAS a ni a, Delhi-ah hian Delhi Development Authority (DDA)-ah vice-chairman a lo ni tawh bawk.
Atal Bihari Vajpayee-a sorkarah khan home secretary a ni thin a, a hnuah Congress kaihhruai UPA sorkarah khan urban development ministry-ah sawn a ni a, Jawaharlal Nehru National Urban Renewal Mission an tih, Rs. vaibelchhe 60,000 zet senna planning & implementation a enkawl thin.
Kum 37 zet sorkar hna a thawh chhungin Baijal-a hi Indian Airlines-ah chairman leh managing director a ni tawh thin a. Prasar Bharati Corporation-ah chief executive officer niin Goa-ah development commissioner leh India-in Nepal a puihnaah counsellor in charge a ni tawh bawk.
Thiamna lamah Allahabad University atangin Arts-ah master’s degree a nei a, Federation of Indian Airlines (FIA)-ah secretary-general a ni bawk.