Gujarat-a Morbi district-ah Nilaini khan chi funna hmun (salt packaging factory)-a a bang chim vangin hna thawk lai mi 12 lai an thi tih thuneitute chuan an sawi.
State Labour & Employment Minister, helai bialtu MLA ni bawk, Brijesh Merja chuan chhiatna hi Halvad industrial area hung chhunga Sagar Salt factory-a thleng a nih thu a sawi.
“Bang chim avang hian hna thawk mi 12 vel an thi a. A chim kara tangte chhanchhuah hna thawh mek zel a ni,” a ti.
Prime Minister Narendra Modi chuan chhiatna thleng pawh a tih thu sawiin thi chhungte hnenah zangnadawmna Rs. Nuai 2 theuh pek an ni dawn tih a puang.
“Morbi-a bang chim avanga nunna chân an awm hi a lungchhiatthlak a. An hun harsaah hian thi chhungte ka tawrhpui em em a, hliam tuarte pawh lo dam leh thuai rawh se. Tual chhung thuneituten a tih theih ang ang an ti mek a ni,” tiin Modi hian Twitter-ah a tar lang.
PMO chuan Twitter-ah vek thi chhungte chu Prime Minister’s National Relief Fund atangin Rs. Nuai 2 theuh pek an nih tur thu leh hliam tuarte pawh Rs. 50,000 theuhva kan an ni dawn tih a tar lang bawk.
Union Home Minister Amit Shah pawhin a tawrhpui thu Twitter-ah a tar lang.
Gujarat Chief Minister Bhupendra Patel pawh biain chhanchhuah hna thawh dan an sawi dun tih a sawi.
Chief Minister Patel chuan thi chhungte hi Rs. Nuai 4 theuh pek an nih tur thu leh district thuneitute chu chhan chhuah hna rang taka thawk turin a ti bawk.