India-a Supreme Court chuan kum 1991-a Prime Minister Rajiv Gandhi thattute zinga thiam loh chantir tawh pakhat chu a chhuah.
AG Perarivalan-a hi kum 30 chuang lung inah a tang tawh a. Kum 1998 khan thi tura tih niin a hnuah hremna hi tihnepsak leh a ni.
Kum 19 a nih lai leka man, Perarivalan-a hi Gandhi-a thahnaah khan bomb tihpuahna tur battery ngaihtuahtu tia thiam loh chantir a ni.
Gandhi-a hi thihchilhin hmeichhe pakhatin Tamil Nadu-a inthlan tura a campaign thusawina hmunah a that a ni.
Kum 1987-a prime minister a nih laiin Sri Lanka ram buaiah Gandhi-a hian Indian peacekeeper tam tak a tir lut a, hemi phuba lak nana thah nia ngaih a ni.
Perarivalan-a hi Sri Lanka-a Tamil mite chenna bik tur ram sual chhuah tuma beitu hel pawl, Liberation Tigers of Tamil Eelam (LTTE)-a mi a ni a. An pawl hi kum 2009 khan Sri Lankan sipaiten an hneh a ni.
Nilaini khan bench pathum awmna Supreme Court bench chuan India Danpuiin thuneihna a pek angin, Gandhi-a thattu thiam loh chantir zinga pakhat, Perarivalan-a hi kum 30 chuang lung in tang tawh leh hremna a tawrh chu a tawk tiin a chhuah a ni.
Kum eng emaw zat kal ta atang khan Tamil Nadu state sorkar chuan Perarivalan-a leh mi dangte hi hremna an tuar zo tawh tiin chhuah turin an lo ngen tawh thin.
Kum 2000 khan state governor chuan thiam loh chantir hmeichhia, Nalini-i thi tura tihna a lo tihtawpsak a. Kum 2014 khan Supreme Court chuan mi dangte thi tura tih pawh khawngaih an dilna kum 11 lai tihkhawtlai a nih hnuah a lo hnuhkirsak tawh bawk.