NSCN-K hel pawl hnuaia peng pakhat, Yung Aung faction chuan Arunachal Pradesh-a Longding district-ah, Longkhaw khua chu kapin khaw mite ruk bo an tum a; mahse, an hlawhchham.
Khaw mite hian an theih ang angin helho hi an lo chhang let a, an tih tum pawh tihtir thei lovin an lo dangchat a ni.
Khaw mite hian hel pawla mi paliin mi pakhat hruai chhuah an tum chu nasa takin an bei let a, an mi ruk bo tum, Khamjan Wangsu-a pawh hi an chhan thei a ni.
Longkhaw khaw mu, Gaon Bura chuan helho silai ken, AK-47 assault rifle pahnih pawh an chhuhsak tih a sawi.
Khaw mite hian helho laka che chhuak tura ngenna FIR chu Longding Police Station-ah an thehlut nghal bawk.
FIR an thehluhah hian khaw thuneitute chuan an khuaa hel lutte hi an pawla lieutenant inti, Palai Wangnow-a kaihhruai an nih thu an ziak.
An khua an luh hian an silai chu tum bik pawh nei lovin an hmet puak a, Khamjan Wangsu-a hi ruk bo an tum zui ta tih an tar lang bawk.
Khaw mite hian Khamjan Wangsu-a hi kut an thlak nual niin an sawi a. Theihtawp chhuaha an chhanchhuah thu an ziak bawk.
Helho leh khaw mite inbeihna a thlen avang hian khaw mite hi an ralti zui hle a, khuaah hian nunau pawh an mangang hle bawk.
“FIR kan rawn thlehluh ang hian hma min laksak tur leh muanawm taka kan khawsak theih nan min pui turin kan ngen a che,” tiin police hnenah hian FIR an thehlut.