An mamawh set hnih la in Tuichangral in Zothan Autoworks Pro Volleyball League 2022 semi-final an lut chiang a. Thawhlehni zanah Durtlang North lakah 3-1 a chakin a sang pali zingah an tel dawn chiang.
R. Dengṭhuama Indoor Stadium, Mualpui a inkhelah kum 2018 a final khel tawh Tuichangral hian set hmasa ber hloh mahse tha taka bei let in hnehna an chang.
Sahil Kumar chuan a khelh tawha a chet ṭhat ber hmangin set thum an la zawn a, D3 Business Player of the Night a thlan a ni leh.
Hmahruaitu Hunthar Veng nen an inkarah point khat chiah awmin league-a sang ber ni thei turin khelh khat an la nei a, Zirtawpniah Chhinga Veng Spikers nen an inhmachhawn ang.
Durtlang North in hnehna chang se semi-final lut chiang thei an ni ve thova, mahse set hnihna atangin an khingpuite hmaah an tlahniam.
An khelh hnuhnun vawi hnihah tlawm zawnin a mawng ber dawttuah an awm a, an dinhmun ching fel turin inrinniah TNT nen league an khar ang.
Team panga inel zingah Hunthar leh Tuichangralin semifinal an lut tawh a, TNT, Durtlang North leh Chhinga Veng Spikers-in hmun ruak pahnih an inchuh zui dawn.