Indian court chuan India atanga Kashmiri-te an inlak hran theih nana beitute hruaitu lawk chu ‘firfiaka chetna kaihhnawih’-ah thiam loh a chantir a, hei hi dam chhung tan emaw, thi tur emawa hrem theihna a ni.
Mohammed Yasin Malik-a hi mi firfiak anga che, dan bawhchhiaa pawisa tuak, firfiak pawla tel, mi phiar leh ram do zawnga chea puh a ni.
Judge Praveen Singh chuan May 25 hian lehlam lehlamin hremna pek a nih dana hnialna leh sawi duh an neih ngaihthlakna hun a siam niin Press Trust of India news agency chuan Ningani khan a tar lang a. Judge hian Malik-a chu a sum leh thil neihte thehlut turin a ti bawk.
A thubuai an ngaihtuah lai hian Malik-a hian an puhnate chu nasa takin a dodal a, zalenna sualtu mai a nih thu a sawi.
“Firfiaka chetna nena inkaihhnawiha min puhna hi phuahchawp, min phiarna leh politics thil vang mai a ni,” tiin court-ah a sawi tih a kaihhruai pawl, Jammu & Kashmir Liberation Front (JKLF) chuan a tar lang.
“Azadi (zalenna) zawn hi dan bawhchhiatna a nih chuan he min puhna leh a kaihhnawih hi ka pawm thlap a ni,” tiin judge hnenah a sawi.
JKLF hi India-in a awp chin Kashmir-a ralthuam nena che chhuak hel pawl ding hmasa ber a ni.
Himalaya tlangdunga India leh Pakistan rama awm Kashmir pum chu pumkhata awma ram pakhata din thlawptu an ni a. Ram pahnih hian anmahni ram ve vea an chhal a ni thung.
Malik-a kaihhruaina hnuaiah hian kum 1994 khan an ralthuam an dah a. Indian sorkar chuan Malik-a hi manin a kaihhruai pawl pawh kum 2019 khan an awm a khap zui a, hei hi New Delhi-in a awp chin Kashmir-in danpui hmanga hung bikna a neih a hlih kum chiah a ni.
India ram china awm Kashmir-ah hian kum 1989 atang khan indan emaw, Pakistan lama bet Kashmir nena inzawm emaw beia ralthuama che chhuak hi an awm tan a ni.
India hian Pakistan chu heng hel pawlte ralthuam pe leh training pawh pea India sipaite do tura puitu niin a puh thin a, Pakistan erawh chuan a pha a. Islamabad chuan heng pawlte thil tum leh rilru put hmang chauh chu a thlawp niin a sawi.
India leh Pakistan hi Kashmir pum awptu zawk nih inchuhin vawi hnih an lo indo tawh a ni.