1) I vuna bawlhhlawh awm te, bal te leh vun cell thi te tih fai reng hi a pawimawh hle a, chu chuan hmai mawm a tih tlem bakah mawm vanga ar-ngeng leh thil dum te tihrehin, vun ro leh phuhlip a titla bawk thin. Hetiang tih reh hi exfoliant an ti a, chutiang chu bazar-ah pawh lei tur tam tak a awm a, thap lutuk lei lo hram ang che. Moisturising mask-in kar khatah vawihnih/khat tal chhunzawm bawk rawh. Arngeng i neih chuan perfume, make-up, sahbawn leh thildang i huat zawng a awm leh awm loh hriat tum bawk ang che.
2) Vun ro leh phuhlip te hi ei that loh vang te, naupai laia hromone danglam vangte leh sik leh sa inthlak vangte a ni duh thin. Hmai leh taksaa tui tam tawk lohte pawh hi tui mamawh ang tawk tlakchham vang a ni fo thin. Inbualnaah a theih hram chuan oil (inbualnaa hman chi) hmang la, inbual zawhah body moisturiser inhnawih bawk thin la, sahbawn vun tiro thei chi reng reng hmang suh ang che. Inbualna tui sa lutukin ti lo la, nawhfe emaw body exfoliant hmang thin ang che. Make-up hnawih hmain moisturiser hmang hmasa ziah la, zan lamah night cream hmang ziah bawk ang che.
3) Naupai laite hian hnute te hi a no bika, thisen zam (blue veins) te pawh hi a lang chiang lehzual thin a ni. A hmur bawr te a dum a, a rawn pawng tek tek thin. Heng hunah hian bra (hnute dawmna) tha hman a tul hle. Tin, hnute mawi nan leh nalh nan moisturising cream in khabe bawr thleng massage thin ang che.
4) Nau neih dawn hnaihah hian hmai hi a duk duh hle a, hnar atanga intanin biang lamah thleng a inzar pharh thin. Nau neih hnuahte a reh leh mai a, thenkhatah erawh chuan hnute pek chhung zâwngin a cham bawk. Nisaa awm tam loh leh make-up hnuaia sunscreen hman ngei ngei tur a ni. Thisen zam sin te te pawh a lo awm thei a, chuvangin facial te leh hmai tihfaina hmanga nawh vak vakte hi tih loh a tha. Hetiang hmai duk leh vun rawng danglam awm thin thup nan chuan foundation hnuaia concealer chu foundation aia dal hmang ang che. Brush- in hnawih la, latex sponge hmawrin hnawih rual mai thin ang che.
5) Infiamna leh taksa insawi-zawina lama hma i lak dawn reng rengin doctor rawn hmasa phawt thin ang che. Ke a kal te, stretching, hmanhmawh lova tlan te leh aerobics ho lam deuh ti thinte hi naupai lai chuan a chi khawp mai. Naupai laia i taksa i enkawl that a, entirnan: taksa kenkawh that (thut ngil leh din ngil te), taksa sawi-zawi te, thawk lak dan dikte leh chawlh hahdam te hi i tih that chuan nau neih i awlsam phah dawn a ni.
6) Nu thenkhat chu an vun te hi midang aiin a râng (stretch marks) bik emaw tih mai tur an ni thin a. Hengte hi tissue inzawmna thler vang a ni tlangpui. Chuvangin, ei tih that leh vun lam enkawl uluk a pawimawh hle. I taksa sawi-zawi tha la, a ran duh bikna laiah oil hmang nasa bawk ang che. Mal, hnute, dul leh mawngtam te, Vitamin E oil hi a tha hle a ni. Tin, i rihna kha vawng tha rawh. Oil emaw cream nitin chulh thin ang che. Pacenta, Collagen leh elas tin awmna product chu lei lo hram la, a chhan chu hengte hi thisen zama an luh thin vang a ni.