Bangladesh leh India-a nasa taka ruah sur avangin tui lian zau tak a khuh mek a mi maktaduai tel buai mekin mi 57 vel an thi tawh niin thuneituten an sawi.
Bangladesh-ah chuan an ram hmarchhak lamah mi maktaduai hnih chuang tui lian hian tibuai mekin kum 20 dawn chhunga an tui lian tawrh nat ber tum a ni a. Tui lian avang hian mi maktaduai khat vel chenna inah an buai phah.
Zakiganj-ah chuan India hmarchhaka Barak River lui tui lianin khaw 100 vel a chim niin Sylhet-a sorkar hotu lu, Mosharraf Hossain chuan a sawi.
“Tui lian avang hian mi maktaduai hnih vel an tangkhang bawk,” tiin AFP a hrilh a, kar liam ta chhung khan mi 10 vel an thi niin a sawi.
Tui lian hi an ram hmarchhak lama an khawpui lian ber, Sylhet-a hmun tam takah pawh a lut niin thuneitu dang pakhat chuan AFP a hrilh a, chhungkaw 50,000 chuangin ni eng emaw zat power an nei lo tawh bawk.
Chief Administrator Hossain chuan ruah sur nasa leh India hmarchhaka Assam-a lui liante atangin tui hi an ramah a lut ber thin niin a sawi.
Bangladesh-a hmun tam tak leh an thenawm, India hmarchhak hi tui len duhna hmun a ni a, mi thiamte chuan sik leh sa inthlak nasa lutuk avangin khawvel pumah khaw awm dan uchuak tak tak a thlen tam phah a rinawm thu an sawi.
Khawvel pum a lum belh avangin boruaka tui awmte 7°C chuangin a lum phah a, hei hian ruah a tihtam phah thei.
Chawlhkar liam ta chhung khan India-ah chuan mi 47 vel tui lian, lei min leh tek avangin an thi niin tual chhunga disaster management lam thuneitute chuan an sawi.
Bangladesh ritu, Assam-ah chuan lei min leh tui lian avangin mi 14 an thi.
Assam thuneitute chuan Inrinni khan khaw 3,200 chuanga mi 850,000 chuang chu tui lianin a tibuai niin an sawi a. Ruah tam lutukin an lo leh chenna in sang tel a tichhe bawk.
Sorkarin tawmna tur a siamah mi 90,000 vel awm khawmin an state-a district tam zawkah tui lian hi buaipui ngaiin a awm mek a ni.
India ramah hian khawchhak lama Bihar-ah pawh Ningani khan tek tlaah mi 33 an thi.
Mi pathumin hliam an tuar a, thlai chinna hmun zau tak tui ruah sur nasa lutukin tichhiain thlai kung tam tak a chhia.
Bihar hian kar liam ta vek khan khaw lum uchuak tak tawngin khaw lum lam hi hmun thenkhatah chuan 40°C laite a tling hlawm a ni.