RB Leipzig in an club chanchin a trophy lian an chawi hmasak ber ni turin Inrinni zanah German Cup final-ah hnehna an chang a. Penalty shootout hmangin SC Freiburg 4-2 in an hneh.
Berlin a Olympic stadium a final inkhelah hian Leipzig in darkar khat dawn player 10 in an khel chungin an dinhmun tha an hum tluan a, extra time tawp dawnah inkhel atanga lakchhuah tawh Kevin Kampl chu yellow card pek nawn a ni bawk.
Minute 19-naah midfielder Maximilian Eggestein chuan Freiburg tan goal a khung a. VAR hmanga endik a nih hnuah goal-ah an pawm.
Leipzig in first half-ah an si phurh an sut teuh a, Christopher Nkunku chuan goalkeeper Mark Flekken dan theih lohin ball per let chu pet mahse defender Nico Schlotterbeck chuan a team a chhanhim.
Second half-ah erawh kum 24 mi France international in a team si phurh sutin goal a khung a, Leipzig an phur thar leh.
Penalty pet a nih hnuah Freiburg captain Christian Guenter leh forward Ermedin Demirovic ten an pet goal lo.
Leipzig managing director Oliver Mintzlaff chuan, “Halftime zawhah team dang hlak ang mai a kan khelh a tul a, red card kha sawisel tur a awm lo. Hetiang chunga a lawm zawk kan ni hi thil ropui a ni.” tiin a lawmzia a sawifiah.