Sorkar flagship programme SEDP hnuaia Mizoram puma vaimim chin uar a nih kuma Fall Armyworm (FAW) puangin lo neitute a tihmangan mek laiin tun hnaia ruahtui tlain pangang inlar mek chu a tihziaawm an beisei tih agriculture department hotuten an sawi.
Kum 2019-a Mizorama inlar tan, FAW hi kumin May thla tir lam atang khan Mizoram hmun hrang hrangah a inlar leh a, nimin thleng khan district 10-a khaw hrang hranga lo neitute vamim chin a bei tawh a; Hnahthialah erawh a la inlar lo nia hriat a ni.
Agriculture Director James Lalsiamliana chuan Hnahthial district atangin FAW inlar leh thu report an la dawn loh thu leh a bak district 10-ah erawh hmuh a ni tawh tih The Zoram Times a hrilh.
Khaw 100 chuanga ram hectare 1,000-a zaua vaimim chinna hmuna inlar mek, FAW puang zel tur chu tun hnaia ruah surin a tihziaawm phah an beisei tih sawiin, “Vaimim zik chhunga pangang awm chu tuiin a chiahin an che hlei thei lo va, an vah chhuah phah a, hei hian eng emaw chen chu a tihziaawm phah turah kan ngai,” a ti.
FAW a inlar leh tih an hriat veleh atangin district tinah department thawktute an chet nghal vat thu sawiin, pangang tihhlum nana hmanraw hman tur leh a hman dante chu lo neitute hrilh hriat zel a nih thu a sawi.
Pangangin vaimimte chu bei mah se vaimim thar chhuah kawngah erawh nghawng a nei thui vak lo thei tih sawiin, “Kum 2019-a FAW a puan vak tum khan vaimim a beih zawng zawng zinga zaa 60 chu chhe vek tura kan ngaih laiin an ei chhiat vek erawh zaa 20 atanga 25 bawr vel chauh a ni,” a ti.
“Tuna FAW-in vaimim a beih tawhte pawh chhe vek tur a ni lo,” tiin, vaimim vui hman loa a ei chhiat tawk chu a nei a nih pawhin thar chhuah titlem rawk tur khawpa ei chhiat a neih an rin loh thu a sawi a, hemi avang hian pangang puang chu en liam mai tur a nih loh thu a sawi.
Tuna FAW inlar mek hi a reh thuai theih nan department-a thawktuten theihtawp an chhuah bakah lo neitu lam pawhin an tih ve tur pangang tihhlum kawngah theihtawp an chhuah a tul tih a sawi.