Aizawl: Congress thalai chuan an sorkar laia Aizawl Bazarpuia bazar building sakna tur a dah sa diam tawh chu tunah hian zaa 35 zawh tawh a nih thu leh New Market sak that hian chhungkaw 2,000 chuang eizawnna a nghawng mek tih an sawi.
An thuchhuahah MPYCC chuan Aizawl Bazarpuia bazar building sakna tur hian Rs. nuai 3641.59 ruahman a ni a. Congress sorkarin Bazarpuia eizawngtute hmakhua a ngaih avangin NEDP atangin a sak tur hi dah a ni a. Sum hi a vaiin K. Deposit-a dah daih a ni a, a lak chhuah leh hi MNF sorkar sumpai thiam loh vangin a harsa a, hnain a tawrh phah ta nia a lan thu an sawi.
Aizawl New Market sak that hna kal mek hi Aizawl City Centre Annexe tih a nih thu leh, contractor chu Lushai Engineering Private Ltd., Ramhlun, Aizawl an nih thu bakah building sak thar hna hi October 4, 2018-a tan niin, thla 36 (kum 3) chhunga zo tura tih an nih thu an tar lang bawk.
MPYCC chuan Congress sorkar laia bazar building sakna tur dah sa diam tawh chu MNF sorkarin a hun takah sa zo nise chuan chawhmeh zuarte thlai zawrh lai hralh tlak loh khawpa tuihawkin nasa taka a len darh loh tur thu an sawi.
MNF sorkar kaihhruai Aizawl Municipal Corporation (AMC) an hrawn mekte chu tuk khat ruah sur avanga bazar leh a chhehvel enkawl kawnga an demawmzia a lan chian hle thu an sawi a ni.