Mahni tui tlan tibawlhhlawhtu nih i tum lo ang u
Aizawl Municipal Corporation (AMC) in Aizawl khawpui a lo thianghlim leh fai zawk nan bawlhhlawh paih dan mumal tak a siam a, khawpui mite pawhin kan zawm tha viaua a lan laiin tawp lai hmun kan la ngah hle.
Tunhnaiah ruahtui a rawn tla tam deuh a, kan bawlhhlawh leh leivung paih dan a rawn lang a, kan tui tlan ber Tlawng lui a nu nasa hle. Hei hi kan rin pui ber a ni leh bawk si. Mahni tui tlan pawh tibal duh leh tibawlhhlawh duh kan nihna hian kan khawsak phung a la hniam zia a tarlang chiang hle. Harhchhuah a va hun tawh em.
PHE department hotute chuan lui tui pump chhuahte chu mipui in tlakin tihthianghlim thin a nih thu sawiin, hetia tui a nut nasat a, khawpui bawlhhlawhte luiah a luan luh nasat hian tui tihthianghlim a harsa a, a hmanrua pawh a ngai tam hle tih an sawi a, Mizoram chhunga kawng laihna leivungte chu kawrah paih thin a ni a, ruah a surin Tlawngah lei vung chu len thlain tui a tinu hle tih PHE department hotute chuan an sawi a, “Tun hnaia Aizawl chawmtu Reiek kaia Tlawng lui leh hmun danga Tlawng lui a nut chhan pawh leivung paih vang hi a ni,” an ti.
Kan changkang viau tawh a a lan laia mahni tuitlan hnar tibawlhhlawhtu kan nihzia a rawn lang leh ta mai thin hi a pawi a, ven sen kan ni lo a nih pawhin phal lohna hmuna leivung leh bawlhhlawh paih loh hi i ching hram hram teh ang u. Keimahni bawk hi a tuartu kan ni leh thin si a.