Pakistan musician Abrar UI Haq-a’n Bollywood producer lar Karan Johar enkawl Dharma Production chu phalna nei lova a hla copy-ah a puh a, T-Series lam ve thung chuan hla hi Dan phalna hnuaia neih a ni, a ti ve thung.
‘Jugjugg Jeeyo’ film thara hla ‘Nach Punjaban’ chungchangah thu inchuhna leh inhnialna a nasa nghal a.
Filmstar lar rual- Anil Kapoor, Varun Dhawan, Neetu Kapoor leh Kiara Adavani te inlanna film hi tunlai hian chai laih laih a ni mek.
Film trailer hi Pathanni khan tlangzarh a nih veleh Pakistan musician hian Twitter-ah a hla hi Indian movie producer te hneha a hralh reng reng loh thu a tarlang.
Hemi kal zelah Dharma Production lakah copyright thubuai siamsakah a vau zui. “He hla ‘Nach Punjaban’ Indian movie-a hman atan ka hralh reng reng lova, a tul dan azirin court-ah kal a ngai ang,” a ti.
Producer Karan Johar hian he hla hi a hmang tur a ni lo. Heti hian phalna leh remtihna awm miah lohva an hman ka hla parukna chiah a ni ta, tiin a lungawi loh thu a sawi.