Congress chuan kum 2024-a Lok Sabha inthlanpui awm tur thlir ranin Thawhlehni khan panel pawimawh tak tak pathum an din a. Task Force-2024 pawh a tel.
Political Affairs Group leh Task Force-2024 bakah October 2 atanga Bharat Jodo Yatra an neih tura ruahmanna siamtu tur an din bawk.
Rahul Gandhi chu PAG-ah hian telin Priyanka Gandhi Vadra chu Task Force-ah hian a tel ve thung a. Party chief Sonia Gandhi chuan PAG hi a ho dawn.
Kanyakumari atanga Kashmir thlenga hma an lakna tur, Bharat Jodo Yatra ruahmanna siam tur mi pakua zingah Digvijaya Singh, Sachin Pilot, Shashi Tharoor, leh Ravneet Singh Bittu an tel bawk.
Panel an din thar pathuma telte enin Congress hian an hruaitu thalai zawkte hmun pek hrek hrek an tum niin a ngaih theih a. PAG leh Task Force-2024 bika awmte hi hruaitu hlun deuh la ni hlawm mah se Central Planning Group for Coordination of the Bharat Jodo Yatra-ah erawh thalai – Pilot, Jothi Mani leh Ravneet Singh Bittu te an tel thung.
Task Force-2024-ah hian P Chidambaram, Mukul Wasnik, Jairam Ramesh, KC Venugopal, Ajay Maken, Randeep Singh Surjewala leh Sunil Kanugolu te pawh an tel.
Party thuchhuah chuan member tin hian an pawl, inbiakpawhna leh chanchinbu, mipui hnen thlen dan tur, sum leh pai leh inthlan hmachhawn dan tura ruahmanna tha tak siam theuh tura mawhphurhna an nei dawn tih tar lan a ni.
PAG hian Congress chief hnenah ni tin thil thlen dan thlirin hma lak dan tur thurawn an pe dawn thung a. Hetah hian Mallikarjun Kharge, Ghulam Nabi Azad, Digvijaya Singh, Anand Sharma, KC Venugopal leh Jitendra Singh te an tel.
Central Planning Group an tih, Bharat Jodo Yatra ruahmanna siam turte zingah hian KJ George, Jothi Mani, Pradyut Bordoloi, Jitu Patwari leh Saleem Ahmed te telin inthlan campaign ni si lova Congress chet chhuahna lian ber tur kalpui dan tur an ruahman ang.