Iran chhimthlang lama in sak mek lai chim vanga thi chu mi 24 an tling tawh niin sorkar chanchinbu chuan a sawi.
Abadan-a chhawng 10-a sang, Metropol office block hi Thawhtanni khan chimin hliam tuar pawh thahnem tak an awm.
Thlalak thehdarhah chuan concrete chhuat leh steel beam te chu a hnuai kawtthlerah a let rem rum a, car inhung eng emaw zat a delh.
Chhanchhuah leh mi zawn hna thawh chhunzawm mek zel a nih laiin a chim chhan pawh chhui mek a ni bawk.
Tual chhunga prosecutor Hamid Maranipour chuan Metropol neitu leh in sak hna thawktu, contractor chu an man tawh tih a sawi.
Sorkar chanchin thar puan chhuahna, Irna chuan in chim ta hi Abadan-a sumdawnna hmun lun lai taka awm niin a chhawng hnuai lam hi tun hnai lawk khan luah tan a ni a, a chhawng sang lam erawh sak chhunzawm mek zel a la nih thu a puang.
Thil thleng hmutute chuan Thawhtanni chhun dar 12:40 (India sanaa chhun dar 1:40) velah rang takin a chim thut niin an sawi.
“A tirah chuan lirnghing emaw ka ti,” tiin dawr neitu pakhat, Ahmad chuan Associated Press a hrilh.
Iranian Red Crescent chuan Abadan leh an chhehvel khawpui rescue team 23 fuan khawmin chet an la nghal tih an sawi a, ambulance pawh thahnem tak an inring bawk.
Iran-a Mehr news agency chuan in chim karah tangkhang tam ber hi a chhawng hnuai lam sak zawh tawha bazarte an nih hlawm thu a tar lang.