Bethlehem Vengthlang in a vawikhatna atan Pro Volleyball champion trophy an chawi a. Bungkawn lakah 3-1 in final-ah an chak.
Ningani zana R Dengṭhuama Indoor Stadium a final inkhelah hian 18-25, 25-21, 25-14, 25-20 in Bethlehem Vengthlang an chak a. Final an luh hmasak berah an champion
Set hmasa ber an hloh hnuah Elisian Medaii leh Lalmuanpuii’n team chawi kangin hun pawimawhah ṭha takin an khel a. Elisian tel lova league an khelh hmasak berah Bungkawn lakah set la lovin an tlawm a, Serkawn, Lunglei nula an chhawr theih aṭangin khelh thum an chak zawnna a ni a, an tlawmna an chhang let nghal.
Bungkawn che sual nawn lehin Pro Volleyball hnuhnung ber 2019 ang bawkin league-a chak vek chhungin final-ah an tlawm leh.
Bungkawn rinrawl F Lalparmawii’n point 16 hmuin vawi kua a tisual a, a tirah inkhel thunun zawk mah se set hnihna aṭangin Bethlehem Vengthlang an chungnung a, spiker ṭha pahnih thiam takin an chhawr a, Elisian chuan point 27 hlawhin 12 a hloh a, Muani’n 22 hmuin point ruk a paih ve thung.
Bungkawnin inkhairual tlang takin khel mah se set hnihna an hloh hnuah danglamna siam theitu an kawl lo va, set lina tawp lamah an innghahna ber F-i’n a ke a tinat avangin lak chhuah a ngai a, trophy an beiseina a thamral. Sawmi’n point 10 hmuin ṭum li a tisual a, FP Lalduhkimi’n point kua a hlawh laiin point nga a paih ve thung a, RK Lalfakmawii’n point sarih a hmuh chanve aia tam vawi li a tisual
Bethlehem Vengthlang tan Elisiani leh Muani bak awmze neia point thawk chhuak tham an awm lo. Mahse, KT Lalrinzuali’n ṭha takin ball a siamsak dun a, rinrawl pahnih hi tlar hmaah inawm chhawkin nuam ti takin an khel. Bungkawnin an dang thei lo a, an khel rei tial tiala hniam lam panin an hnungtawlh zel a, an ball vuak a inthlauh a, chu chu team pahnih inkara daidanna siamtu a ni.
A pum puiah Elisiani’n a thawh hlawk a, a khelh chinah a zawnin vawi thum D3 Business Player of the Night lawmman dawngin tournament chhunga spiker ṭha bera thlan a ni bawk. Mizoram Youth Commission chairman Dr Vanlalṭanpuia, MLA chuan a hmunah inkhel enin a bial chhung aṭanga Pro Volleyball-a tel Elisiani bakah final-a Bungkawn vice captain FP Lalduhkimi leh Durtlang player Lalhmingṭhai hnenah Rs 5,000 ṭheuh a hlan.
Mimal chawimawina:
KT Enterprise Best Spiker
- Elisian Medaii (Bethlehem Vengthlang)
KT Enterprise Best Setter - KT Lalrinzuali (Bethlehem Vengthlang)
KT Enterprise Best Receiver - Lalmuanpuii (Bethlehem Vengthlang)
KT Enterprise Best Coach - Lalhmingliani Sailo (Bethlehem Vengthlang)