Thawhtanni chawhnu khan Delhi khawpui hmun thenkhatah rial nasa takin a tla a, harsatna liantham a thlen hriat ni lo mah se nunphung erawh a tibuai deuh.
Rial tla hian lirthei hma darthlalang leh motorcyclist tam tak a deng a. Flight-tracking website-te chuan Indira Gandhi International Airport-ah khaw awm dan ngaichangin thlawhnaa chuang tur tam tak an innghak khawm a, thlawhna thenkhat chu an chhuah hun tihkhawtlai ngei a nih rin a ni.
“Delhi-a ruah leh rial thawk avangin kan thlawhnate dan pangngaiin a thlawk thei lo mai thei a. Buaina lian zawk a awm loh nan mahni theuhvin kan chuanna lo ngaichang tur leh dinhmun lo thlithlai turin kan inngen,” tiin IndiGo chuan Twitter-ah a tar lang.
Delhi tun hnaiah khaw lum uchuak takin a hmet a, nipui vanglai a nih avangin ni pawh a rei hle a; mahse, Thawhtanni bikah chuan tlai dar 4:30 vel atangin khua a thim deuh khuih tawh a ni.
Delhi-a chengten Twitter-a thlalak leh video an tar lanah chuan kawngpuiah car-te chu an nghing dawt dawt a, thliin a chhem nghing nasa hle bawk tih a lang thei hial a ni.