Nikum mai kha a ni a, a la rei lo hle. ‘Conjuring’ film hlauh-awm leh ‘den’ tak an lakna, In hrâng nia sawi bawk chu internet kaltlangin an zawrh thu chuan mi tam tak ngaihven a hlawh. Rhode Island-a awm In hrâng hi $Mtd. 1.52 a hralh a ni.
Mi tam tak zawhna chu, heti anga In hrâng tak maia sum leh pai tam tak vawmluh chu engnge a sawngsawhlawna le, tih a ni. Luah ngam tak tak an awm ang em, thil tih chi tak a ni dawn em ni, tih te chu zawhna langsar a tling.
Mahse, a leitu hian hei taka hi a lei chhan a ni miau a, ngam huai an tam bawk si nen, tunlaia pawisa hlutna atanga chhutin In man hi 27% zetin a pung hluai a, nikum lama $Mtd. 1.2 ni thin kha a man a sang ta vak mai a ni.
Nei ngei ngei tum
Boston-a inkhuar WonderGroup LLC neitu Jacqueline Nunez chuan he In lei tur hian a inngaihtuah buai hran lo. Neih a tum bur. “He In hi ka neih ngei a ngai a ni tawp mai,” a ti.
He In hi thlahrang kaih hnawih thil mak tak tak zirchiangtute tan mamawh chhanna a ni a, ghost hunter leh thlahrang lam buaipuitute chawtui ber awmna a ni tel bawk.
In neitu Jenn leh Cory Heizen te hian 2019 khan $439,000 in an lei a, an luah atanga thla li chhungzet chu kil hrang hrang atangin thawm mak leh dangdai tak tak an hre chamchi reng mai a, In hnuai lam phei chu tlawh thiang lo ang hiala ngaiin, dik dik pawh an ti ngam lo a ni awm e.
An sawi zel danin, He lai hmun hi 1836 daih tawh khan chei bawl a ni tan a, 1970s chho velah Perron family te chu lawi lutin, thlahrang leh ramhuai lam sawi neuh neuh a awm chho nghal.
Hemi hnu hnu hian heti lang lam zirchiang thin milar Ed leh Lorraine Warren te chu phungbawm sawmin, an zirchiantir. An sawi danin, he In hi Bathsheba Sherman-a thlarauin luahin, a thut chilh, an ti.
Horror movie pui tak mai, ‘The Conjuring’ kha Perron family te chunga thil thleng tak tak behchhana siam niin, en a hlawh rem rem hle.