French Open a thleng thui tura rin hlawh pahnihte an chesual a. Daniil Medvedev leh Stefanos Tsitsipas te fourth round-ah an tlawm.
Roland Garros a Thawhtanni zana inkhelah world number two Medvedev hi Croatian veteran Marin Cilic chuan 6-2 6-3 6-2 in a sawp a. A khingpui lakah tennis tha a khel hleithei lo.
Kum 33 mi US Open champion hlui Cilic hian hnehna chang turin darkar khat leh minute 47 bak Court Philippe-Chatrier-ah hun hman a mamawh lo.
Semi-final luh inchuh turin seeded number 7 Andrey Rublev a hmachhawn leh ang.
“A tir atanga a tawp thlengin tennis match ka khelh tawha la tha ber zing ami a ni chiang. Point hmasa ber atanga a hnuhnung ber thleng khan ka khel tha em em vek.”
“Tunhnai ni 15 hi ka tan thil lawmawm a ni a, ka kheltha tluang hle. Ka che vel, ka ball vuak leh serve te a dik thei hle.” tiin a chak hnuah a sawi.
Seeded number 4 hauhtu Tsitsipas hi set li chhungin a tlawm a. Danish rawlthar Holder Rune chuan hnehin a vawikhatna atan Grand Slam quarter-final a lut.
Kum 19 mi Rune hian 2021 Roland Garros runner-up in nidang a phak loh chu remchangah a la a, a tihsual neih leh thinte point a chantir zelin 7-5 3-6 6-3 6-4 in hnehna a chang.
Rune hi tun French Open hma a Grand Slam inkhel a hnehna la chang ngai lo a ni a, tun tumah hian quarter-final lut turin set khat chauh a la hloh.
“A tirah khan ka zam ve hle a mahse ka tactic ah huaisen taka a tir atanga ka nawr a ngai tih ka hria a, kha kha ka hlawhtlinpui. Mi nawr nasa thin a nih avangin ka nawr ve kha a pawimawh.” a ti.