Law & Judicial Minister TJ Lalnuntluanga, Champhai South bialtu MLA chuan a bial chhunga zirna sikul pahnih nimin khan tlawhin sorkarin zirtirtu indaih lohna phuhruk nan hma a lak zel thu a sawi.
Champhai Kanan Veng-a Govt. R.Hranga High School leh Champhai South Higher Secondary School, Electric Vengte a tlawhnaah thu sawiin TJ Lalnuntluanga hian, “Zirtirtu indaih lohnate hriain sorkarin a phuhruk nan dah belh zel a tum a, harsatna leh mamawh an thlente a tul ang zela lo bawhzuisak a tum a ni,” a ti.
TJ Lalnuntluanga hian zirlaite fuihin social media chak tak leh thu lengvak tam tak awm mek karah thudik tawh lo leh belhchian dawl lo laka inthiarfihlim tur te, mi dangte dem leh sawi chhe mai loa dawmkangtu leh malsawmna thlentu nih tum zawk turin a chah a. Nakin lawka ram leh hnam innghahna tur zirlaite hi an pawimawh tih sawiin, inthununna tha tak, thuawihna leh nungchang tha chhawm nung zel tura chah bawkin, an lakah beiseina dang tak a neih thu a sawi.
Govt. R. Hranga High School hi kum 1988-a din a ni a. Tun dinhmunah zirlai 51 leh zirtirtu pali an awm mek a. Kumin HSLC result-ah khan zirlai exam beitu 19 atangin 17 (89.47%) an pass a ni.
Champhai South Higher Secondary School hi arts subject zirna niin kum 2019 a din a ni a. Tun dinhmunah zirlai 84 leh zirtirtu pasarih an awm mek a. Nimina HSSLC result chhuakah khan zirlai naupang exam hmachhawn 28 atanga 27 (96.43%) ten hlawhtlinna an chang a, subject pakhat ba nei zirlai pakhat a awm a ni.