Aizawl : MBSE-in nimina HSSLC exam result a tihchhuaha pass zawng zawng an lawmpui thu sawiin, pass zo ve ta rih lo te pawh hlawhtling ngei tura theihtawp chhuah zui turin MZP-in an chah.
MZP chuan MBSE-in HSSLC exam result felfai takin a tichhuak nia an hriat thu sawiin, “Thawktute thawhrimnaah lawmthu kan sawi” an ti a. Pawl 12 exam zirlai 11908 zinga 9773 (82.07%)-in an pass avanga lawmawm an tih thu an sawi.
Students’ Self-Support Union (SSU) pawhin HSSLC pass thar te an lawmpui thu an sawi a. Kumdanga top 10-a lang pha ngai lo school top 10-a lang thar te pawh an lawmpui thu an sawi.
SSU chuan kum 2021-a distinction-a pass 9.38% a nih laiin kuminah 6.89% ah a tlahniam a, result pumpuiah nikuma pass percentage 87.80 a nih laiin, kuminah 82.07 ah a tla pawi an tih thu an sawi.
Arts-ah nikuma pass percentage 87.22 a nih laiin kuminah 84.22 a ni a, Science-ah nikumah 89.26 an pass laiin, kuminah 75.47 an pass a, Co- mmerce-ah nikuma 90.70 an pass laiin, kuminah 75.47 chauh an pass tih SSU chuan an sawi.
Stream tina topper te mark hmuh pawh a tlahniam tih sawiin, nikum aia kumina result tlahniam chu pawi an tih thu an sawi a. Zirlai, zirtirtute leh zirlai nu leh pa te nasa leh zuala tan la turin an ngen.
National Students’ Union of India, Mizoram State (NSUI) pawhin nimin vek khan thuchhuah siamin, HSSLC pass te lawmpuina an hlan a. Pass zo ve ta rih lo te pawh beidawng lova hlawhtling ngei tura hma lam pan turin duhsakna an hlan bawk.