- Ruata
Media report rintlak tak takin an tarlan danin Royal Enfield chuan an cruiser Meteor 350-ah variant thar an tichhuak leh dawn niin an tarlang a. Hei bakah hian an bike thar tur Hunter 350 roadster pawh a chhuah har tawh loh hmel.
Meteor 350 variant thar?
Company lam atang chuan official-a puanzar a la awm lo na a Meteor 350 chhuak mekah hian variant dang pakhat Royal Enfield in an dah belh leh hmel a. Hei hi cruiser huangah ro ro thalai la naupang zawk te hip thei tura duan tum a ni thu report thenkhat chuan an tarlang a, khawpui chhunga veivahna tur cruiser mawi leh thalai naupang zawkte pawhin an lawm lehzual tur rawn tihchhuah an tum ber a ni.
Meteor 350 variant thar tur hian a hmalamah 18 inch leh a hnunglamah 17 inch alloy wheel te a hman hmel a. A handle bar hniam deuh bakah single piece contoured seat a nei ang a, a khawl leh part thenkhat rawng dum vek a ni ang a, a rawngah pawh Meteor-a awmsa ni lo rawng thar a awm hmel bawk a ni.
Heng tarlan te bak hi chu Meteor 350 variant thar turah hian thil thar a awm hmel vak lo a. Tuna Meteor tlawm ber Fireball ai hian a thar tur hi Rs 8,000 – Rs 10,000 velin a man a san zawk hmel a. Fireball variant hi tunah hian Rs Nuai 2.01 (ex-showroom) man tur vel a ni. Meteor 350 hi bike tha leh mawi tak a ni sa a, tlema khawih danglam an rawn tichhuak tur pawh hi a phurawm hle a ni.
Hunter 350
Royal Enfield hian Hunter 350 chu tichhuak turin ruahmanna an siam chho mek niin a lang a. He bike hi Royal Enfield bike dang kan hmuh ang lo takin a design leh a bike huang hi a danglam dawn a, roadster bike huanga mi a ni dawn a ni. Roadster han tih hian a design leh a bike nihphungah retro naked roadster design language a nei ang a, a headlamp leh a darthlalang ho a bial ang a, a tail tawi tek tawk tak bakah exhaust te lam deuh a nei dawn a ni.
Report thenkhat chuan tun thla chhoah hian an rawn phochhuak tawh maithei tih tein an tarlang tawh a, engpawhnise company lam ngaihchan zawk phawt a tha awm e. He bike thar tur hi hun rei tak atang tawh khan enchhin niin an enchhin lai thlalak leh video te pawh internet lamah vawi tam kan hmu tawh maithei a. Hetiang lam huang bike Royal Enfield atanga a rawn chhuak tur hi a nghahhlelhawm viau a ni.
Hunter 350 hian a platform leh a khawl chu Meteor hman ang chiah chiah a rawn hman hmel a. A platform hi Royal Enfield platform thar J platform niin kawngkawi leh kawng ngilah pawh nghet leh khalh nuam tura duan a ni a. A khawl pawh hi 349cc, single-cylinder, air-cooled engine, OHC setup nei tel a ni dawn a. He khawl hian 20.2bhp power leh 27Nm torque te a pechhuak thei a ni. Transmission lamah chuan 6-speed gearbox a rawn neih hmel bawk. A bike huang leh pian mil tur hian a platform leh a khawl hi an khawih danglam maithei bawk a ni.
Royal Enfield Hunter 350 lochhuak tur hian a hmalamah telescopic forks leh a hnungah dual shock absorbers te a hmang dawn a, a hnung leh a hmaah disc brake ve ve a nei ang a, standard dual-channel ABS (anti-lock braking system) a nei dawn bawk a ni.
Hunter 350 ke atan hian wire-spoke wheel leh alloy wheel te duhthlan tur a awm hmel a. A kentel zingah hian tripper navigation system a awm tel hmel bawk a ni. Heng bike pahnih tha tak tak turte hi an chanchin kimchang, a chhuah hun tur leh a man tur thlengin company lam hian an puangzar har tawh lo turah ngai ila, lei duh tur leh hetiang lam ngaina tan chuan dawhthei taka lo la nghah lawk a ngai dawn a ni.