AIZAWL: Serchhip bialtu MLA Lalduhoma’n competitive exam-a Mizo lang lo rei lutuk chu zirna In te a changtlun loh vang niin a sawi.
Govt. Serchhip college leh Mizoram youth commission-in Govt. Serchhip college-a Career coaching centre an buatsaih tunkar Nilaini-a a hawnnaah he thu hi Lalduhoma chuan a sawi a.Delhi-ah sorkar zirna sikul a tha tawh hle nia sawiin, “Engtinnge an tih bik, entawntlakte chu kan entawn hreh tur a ni lo,” tiin, “Tunah hian zirtirtu post ruak a tam a, building chhia a tam a, heng atang hian result tha a neih theih loh”, a ti.
Serchhip bialtu MLA chuan “Khawvelin a ngaihpawimawh chu human resource development, education kan tih leh hriselna hi a ni a, ram changkang zawkte an hriselna chhan leh resource an mobilised theihna chhan chu an budget atangin an chang tam em a ni” a ti a. “Ram changkangte tih ang ti turin kan sum dinhmun leh kan resource ten a la tlin lo chungin education leh health sector hi chu priority-a kan dah a ngai a ni, a ti bawk.
Lalduhoma chuan an la neih ngai loh Career coaching centre chu “A hlawhchham thiang lo” a ti a, “Helai bial enkawltu ka nih chhung hi chuan he centre hi a hlawhchham dawn lova, sum leh paia harsatna a awm a nih pawhin a tul ang zelin kan inpui dawn a ni,” a ti bawk a ni.
Career Guidance & Counselling Cell Coordinator Dr Zarzosanga a report danin, Coaching centre hi kum 2014 khan UGC atanga sum hmuh hmangin kalpui a lo ni tawh a, zirlai tur an hmuh that loh avangin a tawp leh a, tunah hian bialtu MLA Lalduhoma’n Rs. nuai 2 a pek hmanga bultanin, MYC nen thawhdunna thuthlung an ziak a, MYC atang hian Rs. 2,80,000 an la dawng dawn a, 1st batch chu tun thla atanga kalpui tawhin, zirlai 24 an awm a, 2nd batch chu June ni 6 atanga kalpui leh tur niin, zirlai 42 inziaklut an awm tawh a, admission la hawn mek a ni.
Faculty 17 an awm a, Group A leh B (Gazzetted leh Non-Gazetted) hna bakah entrepreneurship course kalpui a ni bawk a, tlai dar 4-7 inkarah class an kalpui thin.