Pension kum pawhsei a hun rih lovin a lang
Thalai lehkhathiam, zir sang tak tak, hna erawh hmu mai lo an tam tawh hle a, sorkar in a hnuaia hnaruak a hnawhkhah kim theih loh reng laiin pension kum erawh tihsei belh tumna a awm niin a lang a, hei hi zirlai pawl lian ber MZP chuan an dodal thu an sawi.
Lehkhathiam tak tak leh tling tawk tak tak an awm lai hian duhsakna avanga lak pawh an awm teuh reng zel a, ngaiah kan nei tawh nite pawh hian a lang. Heti a nih reng chuan kan ram hian ‘mi thiam’ aiin ‘mi tam,’ ban rem tawh chiah si lo kan ngah telh telh lovang tih a sawi theih loh.
Tunah pension kum pawhsei tumna a rawn awm leh a, hei hi MZP chuan duh lovin, committee thukhawm chuan Mizoram sorkar hnuaia hnathawkte pension kum tihsan tumna awm mek tha ti lovin, tisang lo turin sorkar an ngen a. Tuna pension kum atana hman mek kum 60 chu la tha tawka an hriat thu an sawi a ni.
Pension kum tihbelh a nih chuan hnaruak a awm lo lehzual ang a, mi tha tak takten hmun an luah tur ang an lo luah zel bawk ang. Tin, thangthar tha za rualte tan hmun a awm lo bawk ang a, hnaruak siam zung zung turin sorkar a che chak lo zual hle bawk ang. Tunah pawh hnaruak tam tak a hnawhkhat thei lo a nih lai a, pension kum pawhsei a nih lehzel phei chuan kan buaina hi a nasa lehzualin a rinawm a, kan zirlai pawlte duh dan pawh hi an zawm thiam ngei a tul rih bawkin a lang a ni.