Mizoram chhunga ei ruk thubuai khawihtu, Court of Special Judge-in nikum chhung khan thubuaiah mi pahnih thiam loh a chantir a, kuminah erawh thubuai chin fel a la awm lo a, vawiina thubuai pakhata court thutlukna puan a ni ang.
Special Court (Prevention of Corruption Act)-a thawkten The Zozam Times an hrilh danin kum liam ta, 2021 chhung khan Court of Special Judge Vanlalenmawia’n thubuai paruk ching felin, chung zinga thubuai palia ei rua puhte chu an ei ru ngei tih finfiahna hmuh a nih loh avangin thiam chantir an ni a, thubuai pahniha ei rua puhte erawh thiam loh chantir an ni thung.
Court of Special Judge-in thiam loh a chantir pakhat zawk chu Department of Disaster Management & Rehabilitation (DM&R) atanga silpauline bill lem hmanga Rs 35,85,000 lak chhuah thubuai a ni a, pawisa lak chhuah hun laia sorkar hnathawk pathum – DMR director hlui, PC Lalthlamuana, cashier Lalhmingliani leh LDC R Vanlalhmuak te chu kum hnih theuh jail tang tura hrem an ni a; silpauline supplier Thanzami Tochhawng pawh kum khat tang tura hrem an ni.
DM&R atanga silpauline bill lem hmanga sum tam tham tak lak chhuah thubuaia thiam loh chantirte hian high court-ah an appeal mek nia thudawn a ni a, court sang zawk hian thuremna a la tichhuak lo.
Nikum chhunga ei ruk thubuaia thiam loh chantir pakhat zawk chu PWD executive engineer thin, R Zatawna a ni a, ani hi PWD EE a nih lai, 2006 khan BSNL atangin OFC Lines phum nana kawng an tihchhiat siam thatna tur Rs 6,75,000 dawnga puhnaah thiam loh chantir a ni a, kum thum leh a chanve jail tang tur leh Rs 20,000 chawi tura hrem a ni.
Ani pawh hi high court-ah zualko lehin, thutlukna siam a la ni lo.
Tun dinhmunah thubuai ngaihtuah tur, pending mek 27 awmin chung zinga thubuai 17-te chu Mizoram sorkar hnuaia Anti Corruption Bureau (ACB)-in an buaipui a ni a, thubuai 10 chu Central Bureau of Investigation (CBI) buaipui a ni thung.
Kuminah Court of Special Judge hian thubuai chin fel a la nei lo a, tun kar chho atangin ei ruk thubuai an khawih thenkhatah judgement order a tichhuak dawn a, vawiinah pawh judgement order tihchhuah tur a awm dawn a ni.
Special Court PC Act-a thawkte chuan nikum khan Covid-19 avangin thubuai an ngaihtuah a muan phah deuh tih a sawi a, chung bakah ei ruk thubuai chu thubuai dang ang a nih loh avangin thuhretute pawh koh tam an ngai a, a thubuai chhuitu lamte nen, hengte avang hian thubuai chin fel zung zung a har chang a awm tih sawiin, chutihrual chuan theihtawp chhuahin a rang thei anga ching fel vat tura hma an lak thin thu The Zozam Times an hrilh.