Aizawl: Kawrtethawveng-a Kawrthah Zone Football Tournament kharnaah Hachhek bialtu MLA Lalrindika Ralte chu khuallian niin a hmanpui a, chhungril lam inpekna hi hlawhtlinna atana pawimawh ber a ni tih a sawi.
Tournament kharna inkhawmah thu sawiin Lalrindika Ralte, MLA hian, Mizo thalaiten an tum phawt chuan hlawhtlin theih lohna chhan tur pakhatmah an nei lo tih sawiin, “Engkim ti theitu Pathian hi a fair tawk. Malsawm tlak, hlawhtling tlak kan nih chuan kan hmalamah hian hlawhtlinna a awm vek a ni. Hlawhtlinna atana pawimawh ber chu chhungril lam inpekna hi a ni. Kan ngaihtuahnain pha ve mah se, chhungrila inpekna tak tak a awm loh chuan a hlawhtlin theih loh,” a ti.
Infiamna hmanrua leh khelmual thate nei mah se, chhungrila inpekna tel lo chuan hlawhtlinna a awm thei lo tih a sawi a. An theihna leh thiamna tak takte khawvel hmuha pho chhuak turin Hachhel bial thalaite fuihin, Pathian tihna nena theihtawp chhuaha hlawhtlin tum rana hmalam pan turin duhsakna a hlan nghal.
He hunah hian Hachhek bialtu MLA Lalrindikna Ralte hi India football team captain hlui, Jeje Lalpekhlua’n tawiawmin, thu a sawi bawk.
Kawrthah Zone Football Tournament-ah hian team 16 an tel a. First Division-ah team pakua awmin, Kawrtethawveng an champion a. Second Division-ah team pasarih telin W. Bunghmun an champion bawk.