Aizawl : Sangau-a Primary Health Centre (PHC) sak thar chu nimin khan Lawngtlai East bialtu MLA H. Biakzaua’n a hawng.
Sangau PHC building hi state priority programme 2018-2019 kaltlanga sum hmuh Rs. nuai 145 senga sak a ni a. Zamzo Engineering Construction & Consultancy-in December 17, 2019 ah hna tanin, April 10, 2021 ah an zo niin sorkar thuchhuahin a tarlang.
PHC thar hawngtu H. Biakzaua chuan Sangau khua leh a chhehvel mipuite tana tangkai tur Sangaua PHC building sak thar a ni lawmawm a tih thu a sawi a. sorkarin hriselna ngaipawimawhin, tan a la nasa nia sawiin, Lawngtlai district-ah Health Clinic Centre 11 hawn belh a nih thu leh Lawngtlai khawpui chhungah pali 4 leh Sangau RD block huam chhungah 7 dah a nih thu a sawi.
H Biakzaua chuan Health Sub-Centre awmlohna khuaah te Health Clinic Centre dah vek tura hmalak a nih thu sawiin, a hmunhma te pawh enfel tawh a nih thu a sawi bawk.