AIZAWL: Tualte-a To mato chingtute thar Tomato quintal 162 chu Silchar-a hralh turin nimin khan Dy. Chief Minister Tawnluia’n a vailiam.
Sorkar thuchhuahin a tarlan danin, Tualte khuaah hian kum 2019 khan Tomato Growers’ Association din a ni a, Horticulture department leh KVK-te puihnain chhungkaw 24 in Tomato an ching tan a. Kum 2021-ah Tualte Tomato Growers’ Co-operative Society Ltd. hming pu zuiin, society ngelnghet tak a awm mek.
Society hnuaiah hian Primary agriculture credit society (PACS) kalpui mek niin, Tomato kung 1000 chin neite chu association member-a ziahluh an ni a, Tomato chingtu chhungkaw 210 te society-ah share neiin an awm mek, tuna Tomato thar seng mek hi chhungkaw 120 an ni.
Tualte khua hi Horticulture department-in “Horticulture for Youth” tih thupui hmanga a hmaalakna tipuitlingtu khua an ni a, Society hruaitu – office bearers te chu thalai kum 25-35 inkar mi niin, Tomato chingtute kum 25–45 inkar mi an ni a, an zinga za-a 80 te chu kum 35 hnuailam an ni. Horticulture department atangin tanpuina hrang hrang an dawng thin.
Bialtu MLA leh Dy. CM ni bawk Tawnluia puihnain Tomato Ketchup & Sauce siamna khawl an nei tawh a, he khawl hmang thiam tur hian Horticulture department-in Society member 4 te CFTRI, Mysore-ah training tur in a tir a, tunah chuan he khawl hmang hian Tomato Ketchup & Sauce siam chhuak ta- whin, hralh chhuah tlak a ni tih pawmpui an ni tawh a, hralh chhuah phalna an dil leh mek niin sorkar thuchhuah chuan a tarlang.
Tualte khua hian kum 2019 atanga kumin May thla thleng khan Tomato quintal 6992 an thar tawh a, Rs. vbc 3.67 an lalut tawh niin sorkar thuchhuah chuan a tarlang bawk.
Silchar-a hralh tur Tualte Tomato vailiamtu Dy. CM Tawnluia chuan “Horticulture department-in kuthnathawktute tana a hmalaknaah hmasawnna hrang hrang kan hmu a, heng zinga a hlawkna teltute chu Tualte-a Tomato chingtute hi an ni”, a ti a. Tualte khaw hlawhtlinna chu khawtlang tanrualna bakah thalaite an phur a, an tui em vang nia sawiin, amah ngei pawhin an hlawhtlinna tura theihtawp a chhuahpui thu a sawi bawk a ni.