Newcastle United in an tlarhma tichak turin French rawlthar lakluh an tum a. Stade de Reims striker Hugo Ekitike nen inbiakna an nei uluk.
Club pahnihte inkarah indawrna mumal tak awm tawh mahse inremna neih erawh a la hnai chiah lova, mahse club ten an inrem theih ngei an beisei.
Kum 19 mi Ekitike hi January thla khan Magpies hian lakluh an lo tum tawh a, mahse France-ah season hman zawh a duh avangin an hlawhtling lo.
Magpies hian season liamta khan striker rinrawl Callum Wilson chu inhliam avangin thla li an chhawr thei lova, hei vang hian Ekitike hi an ngaihven.
Ani bakah hian Newcastle hian centre-back thar lakluh an duh a, sporting director thar Dan Ashworth chu hemi lama hma la thuai tura tih a ni.
January thla khan Lille atangin Netherlands Under-21 defender Sven Botman an ngaihven tawh a. Manager Eddie Howe hnuaia khel tawh Manchester City defender Nathan Ake nen pawh sawizawm an ni.
Tunge Ekitike?
Feet 6 leh inches hnih a sang palian striker che rang hi tun thla a kum 20 tling tur a ni a. Tun season liamta khan Reims tan first team-ah rinrawl ni tanin match 26 atangin goal 11 a khung a, midang khung tur vawi li a siamsak.
Team in a mamawh dan anga veilam kilah pawh khel thei Ekitike hi penalty area chhungah a hlauhawm zual a. Tunah hian France Under-20 team tan Toulon tournament a khel mek.