- Ruata
Hun rei tak ata thawm lo nei tawh khawvel huapa lirthei tha leh mawi siamtu lar France company Citroen chuan an lirthei thar tur C3 chu July ni 20 hian tlangzarh an tum a, July ni 1 atangin a book theih dawn a ni.
A khawl leh thildang
C3 hi petrol khawl pahnih – 1.2-litre naturally-aspirated leh 1.2-litre turbocharged petrol te a awm dawn a. A hmasa zawk hian 82PS power a pechhuak thei ang a, pakhat zawk hian 110PS power leh 190Nm torque a pechhuak thei dawn a ni.
Citroen C3 hian gearbox chi hnih duhthlan tir a rawn nei dawn a. Pakhat hi 5-speed manual niin hei hi naturally-aspirated petrol-ah a awm ang a. Pakhat hi 6-speed manual niin turbocharged petrol engine ah a awm dawn thung.
He lirthei thar tur hian automatic gearbox a nei tel bawk ang a, hei hi dual-clutch transmission a ni dawn a ni. C3 hatchback thar tur hi a elpui tura ngaih Nissan Magnite, Renault Kiger leh Tata Punch te aiin a khawl a chak zawk dawn a ni.
Design leh lirthei ruangam
Citroen C3 hi a lirthei sei zawng 3.98 meter a ni ang a, a wheelbase hi 2,540mm niin a chhung zau zawng, boot space pawh 315-litre a ni dawn a ni. Citroen chuan he lirthei thar hi “hatchback with a twist” tiin an vuah a, lirthei hnung bul, te lam ho, hatchback an tih pangngai chu an rawn ti dangdai bik deuh tihna te pawh a ni awm e. A khan san zawng, ground clearance pawh a tha viau dawn a, 180mm a ni ang a, hei hi India ram kawngpui angah chuan duhthusama tha a ni dawn a ni.
Citroen C3 hi India rama duan CMP (Common Modular Platform) nghahchhana siam tur a ni a. Hei hi an mid-sized SUV leh sedan lo chhuak tur pawhin a hmang dawn a ni. Double DRLs a nei ang a, signature Citroen grille chrome treatment tel a hmang dawn bawk a. Hei bakah hian dual-tone paint scheme, split LED headlamp cluster, wheel arches langsar leh tha tak leh black cladding te kan hmu dawn bawk a ni.
A chhung leh kentel
A chhung lamah chuan he hatchback hian 10-inch touchscreen infotainment system, wireless Apple CarPlay leh Android Auto awm tel a hmang ang a. A hnung leh a hmaa thu te tan USB fast charger a awm ang a. Hei bakah hian manual air conditioning, plain steering wheel pangngai tawp hmehna hrang hrang awm lem lo a nei bawk ang a, digital instrument console leh thildang dang a awm tel dawn bawk a ni.
Citroen hian C3 hi monotone rawng chi 4 leh dual-tone rawng chi 2 an rawn neihtir ang a. Accessory package 3, customise theihna tur chi 56 bakah accessories chi 70 lai an rawn neihtir dawn bawk a ni.
Lirthei company hrang hrang Mizoramah pawh kan neih kim viau tawh laiin Citroen hi chu kan la hmelhriat tam vak lo a. India rama an lirthei a la tam loh vang te pawh a ni ang a, lirthei thar in hmun an rawn chan zung zungna hmun, kan state-ah pawh hian he France lirthei company lar takin lirthei an rawn tihchhuah tur hi kan hmu thuai turah beisei ila. A man pawh kan lei tawk tur tak man huanga mi a nih hmel a ni.