An captain in ram tana a goal 50-na a khung zanah England an chak zo lova. UEFA Nations League inkhelah team tha leh che tha tluang lai Germany nen 1-1 in an inhnehtawk.
Munich a Allianz Arena a inkhelah England captain Kane-a’n minute 88-naah penalty atangin an si phurh a sut a. Three Lions tana goal 50 khung tling thei pahnihna a ni.
He result avang hian England in tun Nations League tournament-ah an point hmasa ber an hmu a, Inrinni zana Hungary laka an tlawm hnuah khelh hnih atangin point khat an nei.
Kane-a’n England chanchin a goal khung hnemah Sir Bobby Charlton a lehpel a, goal thumin Wayne Rooney a pha lo mek.
England hi a zawnin an tlawm dawn niin a lang hman a, inkhel hun tam zawk chhung Germany an kheltha. Minute 50-naah mualneitu lamin Jonas Hofmann hmangin goal an khung a. Mahse inkhel tawp hma in Nico Schlotterbeck chuan Kane a tih tluk avangin penalty a chawi a. England an him.
Inrinni zanah Molineux Stadium-ah Italy leh England an inkhel leh ang.Duhthlan tur ngah England
Europe a league lian dangte ang lova season khat a tualchhung inelna langsar pathum khelhna chu England a ni a. Hei hi an national team in a tuar niin tam takin an ngai thin.
Premier League leh FA Cup bakah EFL Cup khelh a nih avangin English player-te season a hautak a. Germany lakah chhuanlam tling ni lo mahse English player-te an tho hleithei lo.
Second half a Hofmann-a goal a luh hnuah England an insiamtha hleithei chuang lova. Minute 18 a la awmin England in substitute bench atangin Jack Grealish leh Mason Mount an dah lut a, an inkhel a danglam.
Minute 80-naah West Ham United forward Jarrod Bowen an dahlut bawk a, ani hian Germany tlarhnung a chawk buai.
An inthlak danglam hma in Hansi Flick-a pawlten inkhel an thunun hneh zawk a, chance tha pawh nei nualin Jordan Pickford-a’n Thomas Muller leh Timo Werner te goal khung tur a dansak.
Southgate erawhin Euro 2020 final khel thei England squad-ah duhthlan tur a ngah a. A player neihte an that dan ang ber tura khelhtir dan zawn erawh a la ngai.
4-2-3-1 formation hmangin midfielder pawimawh Kalvin Phillips chu hliam vanga lakchhuah ngai thuai mahse Borussia Dortmund rawlthar Jude Bellingham-a’n England mi pawimawh a ni thei tih a lantir.England fapa tlanbo?
Tunlai khawvela forward beiseiawm ber pawl chu Jamal Musiala a ni a, ani hian England tan Under-15 leh Under-17 ah te football a khel a, Bellingham nen an khel dun thin.
Mahse kum 19 mi Bayern Munich forward in Germany tana khelh a thlang zawk a. Thawhlehni zanah Three Lions a hmachhawn.
Khelmuala hun a hman chhungin England player hlauhawm ber a ni fova, a tlan chakna leh huaisenna a hmuhnawm a. Germany tana player tangkai tak a ni thuai dawn tih a hmuh theih.Southgate a lungawi
England boss Gareth Southgate chuan an tlawm nawn lo chu result tha a nih thu a sawi a. A player-ten khelmual chhungah an teammate te tana an taksa leh theihna zawng zawng an hlan chu a fak.
“Player-te chona kan siamsak a, team tha hi a zawnin an tlawm ngai lo tih kan inhrilh.”
“Wembley Stadium-ah hian result tha kan nei thin a, mahse tunah keimahni tualzawlah ni lo result tha hlawhchhuah kan duh a. Result duhawm lo tak kan neih hnua thawh lehnghal kha a pawimawh tih kan inhrilh.” tiin inkhel zawhah a sawi.Group A3 hmahruaitu Italy
European champion Italy in Hungary 2-1 in an hneh a. UEFA Nations League Group A3-ah hma an hruai.
Cesena a Stadio Dino Manuzzi a inkhelah Italy in minute 30-naah Leonardo Spinazzola thawhrah sengtu Nicolo Barella goal khung hmangin hma an hruai a. Halftime dawnah Lorenzo Pellegrini chuan an goal hnihna a khung a, Matteo Politano ball pawh let chu chiang takin goal-ah a pet lut.
Hungary hian second half-ah Gianluca Mancini own goal an nei ve thung.
Kumin World Cup khel lo tur Italy hian Roberto Mancini hnuaiah team thar din tumin ke an pen a, tun international week-ah player tawnhriat la nei tam lo zawk leh ram tana rinrawl ni lo te an chhawr hnem.
Heti chung hian inkhel thununtu an ni nghal a. Hungary goalkeeper Denes Dibusz che tha lo se goal khung belh nual thei an ni.
Inkhel zawhah Mancini chuan, “First half kha inkhel hmuhnawm tak a ni a, kan kheltha a. Football match hmuhnawm tak a ni ang. Second half-ah erawh an goal khung khan kan dinhmun a ti awlsam lova, hei aia chiang zawka chak thei tur erawh kan ni.”
“Season zawh tawh hnu a nih avangin kan chau a, hei hi thil mak a ni lo. Inkhel kan dahthat a hun tawh laia goal kan chhuah avangin thil a awlsam thei lo. Team naupang tak erawh kan ni a, chuvangin rim taka kan la thawh zel a ngai. Bul tanna chhia a ni lo ve.” tiin a sawi.