United States sipai general lawk pakhat chuan Ladakh bula Chinese hmalaknate chu ngaihven ngai a nih thu leh an in leh hmunhma din thenkhatte chu mi beng harhtu a nih thu a sawi.
General Charles A Flynn, Commanding General, US Army Pacific chuan Himalaya tlangdunga China hmalakna chu Beijing-in ‘inrem lohna thlen a tumna leh a tha lo zawnga a chetna’ niin a sawi.
“An chetna thenkhat hi chu thlir reng a ngai niin ka hria a. Western Theatre Command-a an hmunhma din thenkhatte phei chu mi beng harhtu a ni. An sipai inchhawp dan zawng zawngte thlir hian ‘engvang nge’ tia a zawh ngei tur thil a ni,” tiin Asia-Pacific region-a US sipaite hotupa chuan chanchinbumi thenkhat a kawmnaah a sawi.
General Flynn chuan China-in hetianga hma a laa kawng a zawh mek chu ram inrem lohna thlentu a nih theih thu leh inthian thatna tura tangkaina nei lo a nih thu a sawi.
“China-in hetiang rilru pua hma a lakna hi keini pawhin tangruala kan er let ve a ngai niin ka ngai a ni,” tiin general chuan a sawi.
India leh US sipaite chuan hmun sanga chet lak dan tur zirna hun an huaihawt dawn a, hei hi October thlaa Yuddh Abhyas exercise an neih tur peng pakhat niin Himalaya-a feet 9,000-10,000 vela sanga chet dan an zirho ang.
Nunchan an zirna tur hmun tak hi sawi a la awm lo va. India sipaite hi khaw vawt uchuak takah hetiang hi Alaska-ah an lo zir tawh bawk.
Ram pahnih sipaiten nunchan an zir tur hi hmun sanga indonaa chet dan tur niin a huhova hma an lakna tur lam thil a ni.
Nunchan zirnaah hian technology thar, Air Force hmanrua, attack aviation, logistic leh thil hriat inhrilh tawn pawh an ti vek dawn a. “He hun lo thleng tur hi Indian Army leh US Army te tana hlawk tak tur thil a ni ve ve a ni,” tiin General Flynn chuan a sawi.
US general hian ni li cham turin India a tlawh mek a, Thawhlehni khan Army Chief General Manoj Pande nen inkawmin ram pahnihte ram venhimna lama thawh dunna thilte an sawi dun a ni.